सोलापूर : जिल्हा मध्यवर्ती सहकारी बॅंकेच्या (Solapur District Central Co-operative Bank) निवडणुकीचा (Election) धुराळा उडण्यापूर्वीच शांत झाला. डीसीसीच्या अगोदर निवडणुकीचा गुलाल उधळण्यासाठी सोलापूर जिल्हा सहकारी दूध उत्पादक व प्रक्रिया संघ (दूध पंढरी) (Dudh Pandhari) सज्ज झाला आहे. दूध संघाच्या निवडणुकीसाठी प्रारूप मतदार यादी जाहीर झाली आहे. या मतदार यादीत फक्त 263 दूध उत्पादक संस्था मतदानासाठी पात्र ठरल्या आहेत. या 263 संस्थांमधील फक्त 57 संस्थांच्या प्रतिनिधींना दूध संघाच्या संचालकपदाची (सर्वसाधारण असलेल्या 12 जागांवरील) निवडणूक लढविता येणार आहे. त्यामध्ये माजी संचालक आमदार संजय शिंदे (Sanjay Shinde), माजी आमदार दिलीप माने (Dilip Mane), माजी उपाध्यक्ष मनोहर डोंगरे (Manohar Dongare) यांच्या नावांचा ठराव नाही. त्यामुळे दूध संघाच्या आगामी निवडणुकीत या तीन दिग्गज नेत्यांना ब्रेक बसण्याची शक्‍यता आहे. (Veteran leaders have been given a break in the District Milk Association elections)

माजी आमदार माने यांच्या नावाचा ठराव 263 संस्थांमध्ये आहे. परंतु 57 संस्थांमध्ये त्यांच्या नावाचा समावेश नाही. आमदार संजय शिंदे व माजी उपाध्यक्ष मनोहर डोंगरे यांच्या नावांचा ठराव 263 संस्थांमध्येही नसल्याने ते आगामी निवडणुकीपासून अलिप्त राहण्याची शक्‍यता आहे. दूध संघाच्या संचालकपदाची आगामी निवडणूक लढविण्यासाठी पात्र ठरलेल्या 57 संस्थांमध्ये माजीमंत्री सिद्धाराम म्हेत्रे (Siddharam Mhetre), जिल्हा परिषदेचे सदस्य विक्रांत पाटील (Vikrant Patil), जिल्हा परिषदेचे सदस्य रणजितसिंह शिंदे (Ranjitsinh Shinde) या प्रमुख नावांचाही समावेश आहे. त्यामुळे दूध संघाच्या आगामी निवडणुकीत हे तीन नवे चेहरे दिसण्याची शक्‍यता आहे.

प्रशासक येण्यापूर्वी दूध संघावर कार्यरत असलेल्या संचालक मंडळातील आमदार प्रशांत परिचारक (Prashant Paricharak), योगेश सोपल (Yogesh Sopal), राजेंद्रसिंह राजेभोसले, बबनराव आवताडे, मारुती लवटे, विजय यलपल्ले, संभाजी मोरे, औदुंबर वाडदेकर, अलका चौगुले यांचा त्या 57 जणांमध्ये समावेश आहे. त्यामुळे यातील अनेक जण निवडणुकीनंतरही पुन्हा दूध संघात दिसण्याची शक्‍यता आहे. 263 मध्ये पात्र ठरलेल्या व्यक्तींना महिलांच्या दोन, एससी, एसटीची एक, ओबीसीची एक, भटक्‍या जाती / विमुक्त जमाती / विशेष मागास प्रवर्गाची एक अशा 5 जागांवर निवडणूक लढविता येणार आहे. पात्र यादीवर दावे व हरकती स्वीकारण्याची प्रक्रिया सुरू आहे. या प्रक्रियेत काही बदल होतो का?, यादीच्या विरोधात कोणी न्यायालयात धाव घेतो का? यावरही बऱ्याच राजकीय घडामोडी अवलंबून आहेत.

प्रशासकामुळे पारदर्शक यादी

दूध संघाच्या निवडणुकीसाठी ठराव पाठविलेल्या 959 संस्थांपैकी फक्त 263 संस्था मतदानाला पात्र ठरल्या आहेत. 696 संस्था अपात्र ठरल्या आहेत. पात्र ठरलेल्या 263 संस्थांमधील फक्त 57 संस्थांचे प्रतिनिधी संचालकपदाची निवडणूक लढण्यास पात्र ठरले आहेत. दूध संघावर सध्या प्रशासकीय मंडळ कार्यरत आहेत. प्रशासकीय मंडळाचे अध्यक्ष म्हणून जिल्हा विशेष लेखापरिक्षक श्रीनिवास पांढरे (Shriniwas Pandhare) व मंडळाचे सदस्य म्हणून सहाय्यक निबंधक आबासाहेब गावडे (Abasaheb Gawde) कार्यरत आहेत. दूध पंढरीची मतदार यादी प्रशासकांमुळे निर्भेळ व पारदर्शक झाल्याने अनेकांचा पत्ता गूल झाल्याचे दिसते.