ऐतवडे खुर्द ( सांगली ) - मिरज येथील मित्राला हळद फॅक्‍टरी टाकण्यासाठी वडिलांच्या नावावर काढून दिलेले कर्ज मित्राने न भरल्याने ऐतवडे खुर्द (ता. वाळवा) येथील बाबासाहेब पांडुरंग पाटील (वय ४०) यांनी गळफास घेऊन आत्महत्या केली. याबाबतची फिर्याद संभाजी यशवंत पाटील यांनी कुरळप पोलिसात दिली आहे.

बाबासाहेब पाटील यांनी २००३ मध्ये त्यांच्या मित्राला वडिलांच्या नावे सात लाख रुपये कर्ज काढून दिले होते. त्या कर्जाचा कोणताही हप्ता त्या मित्राने न भरल्याने त्याची रक्कम व्याजासह ५१ लाख रुपये झाली आहे. या बाबत बाबासाहेब पाटील यांनी त्या मित्राला वेळोवेळी कल्पना देऊनही त्याने कर्जाचे हप्ते भरण्यास टाळाटाळ केली होती. जुलै महिन्यात बॅंकेकडून थकीत कर्ज भरण्यासाठी नोटीस आली होती. त्यानंतर परत वारंवार मित्राकडे जाऊन कर्ज भरण्याची विनंती पाटील यांनी केली.

हेही वाचा - अबब ! खाद्यतेलाच्या दराने ओलांडली शंभरी; काय आहेत कारणे ? 

पैसे भरण्यास टाळाटाळ

मित्राने स्टॅंपवर ‘मी हे पैसे घेतले आहेत, पैसे भरण्याची जबाबदारी माझी आहे, लवकरच ते पैसे भरू’ असे लिहून दिले. त्यानंतर बॅंकेचे कर्मचारी कर्ज भरावे म्हणून वारंवार घरी येत होते. मित्राला याची कल्पना देऊनही त्याने पैसे भरण्यास टाळाटाळ केली होती. या सर्वाला कंटाळून दुपारी साडे बाराच्या  सुमारास बाबासाहेब पाटील यांनी शेतातील जनावरांच्या शेडमधील आड्याला दोरीने गळफास घेऊन आत्महत्या केली. या घटनेने ऐतवडे खुर्द परिसरात हळहळ व्यक्त होत आहे. बाबासाहेब पाटील यांच्या पश्‍चात पत्नी, दोन  लहान मुले, वृद्ध वडील असा परिवार आहे. या बाबत बाबासाहेब पाटील  यांचे चुलत बंधू संभाजी पाटील यांनी कुरळप पोलिस ठाण्यात फिर्याद दिली आहे. कुरळप पोलिसांनी अज्ञात कारणातून गळफास घेऊन आत्महत्या अशी नोंद केली आहे. 

हेही वाचा - अबब ! गोकुळश्री पुरस्कार विजेती म्हैस अन् गाय दिवसाला देते इतके दुध 

कर्जमाफीत माफ होईल का ?

कर्जमाफीत माझे कर्ज माफ होईल का, याबाबत बाबासाहेब पाटील गेल्या काही दिवसांपासून अनेकांना विचारणा करीत होते. मात्र, शनिवारी दोन लाख कर्जमाफीची घोषणा झाल्यानंतर बाबासाहेब पाटील निराश होते. अखेर आज त्यांनी गळफास घेऊन आत्महत्या केली.