चिक्कोडी : आलमट्टी जलाशयातून (Almatti Dam) २६ दरवाजांतून तब्बल दोन लाख २५ हजार क्युसेक विसर्ग सुरू केला आहे. महाराष्ट्रातील धरण (Dam in Maharashtra) क्षेत्रासह कोल्हापूर, सांगली, चिक्कोडी भागात पावसाचा जोर वाढल्याने व महाराष्ट्रातील काही धरणांतून विसर्ग करण्यात येणार असल्याने खबरदारी म्हणून हा निर्णय घेण्यात आला आहे. दरम्यान, आलमट्टीत दोन लाख क्युसेक आवक सुरू आहे.

मंगळवारी सकाळी दीड लाख क्युसेक असलेला विसर्ग रात्री ९.३० वाजता एक लाख ७० हजार इतका करण्यात आला होता. पण, पाऊस संततधार राहिल्याने व नद्यांतून पाणी अधिक वाहून आल्याने बुधवारी सकाळी ९.३० वाजता हा विसर्ग दोन लाख क्युसेक इतका केला गेला. बुधवारी पावसाचा जोर वाढत गेल्याने व कोल्हापूर जिल्ह्यातील काही धरणांतून विसर्ग करावा लागणार असल्याने महाराष्ट्राच्या सूचनेनुसार आणखी विसर्ग करण्याची विनंती करण्यात आली.

त्यानुसार बुधवारी (ता. २४) संध्याकाळी सात वाजता तब्बल दोन लाख २५ हजार क्युसेक विसर्ग करण्यात आला आहे. गतवर्षीही टप्प्याटप्प्याने हा विसर्ग सव्वा दोन लाखांपर्यंत गेला होता. त्यामुळे हा आतापर्यंतचा सर्वाधिक विसर्ग आहे. सध्या चिक्कोडी विभागात नद्यांतून येणारे पाणी पावणे दोन लाख क्युसेकपर्यंत असल्याने पाणी संथगतीने वाढत आहे. आलमट्टीच्या विसर्गामुळे यंदा पुराचा मोठा फटका बसलेला नाही. ज्याप्रमाणात पाणी वाहून येत आहे त्याचा विचार केल्यास सध्या चिक्कोडी विभागाला मोठ्या पुराचा फटका बसला असता. सध्या आलमट्टी व महाराष्ट्राच्या समन्वयातून पुराचा फटका बसलेला आहे.