मिरज : जतहुन सांगलीमार्गे कोल्हापूरकडे निघालेल्या राज्य परिवहन महामंडळाच्या "विठाई" गाडीत वनीता शामराव गुळवे (रा. गोंधळेवाडी ता. जत) या गर्भवतीने गोंडस बाळास जन्म दिला. दोघांनाही भोसे येथील प्राथमिक आरोग्य केंद्रात दाखल करण्यात आले आहे. बाळ आणि बाळांतिणीची तब्येत एकदम चांगली असल्याचे भोसे प्राथमिक आरोग्य केंद्राच्या आरोग्य आधिका-यांनी सांगितले.

गोंधळेवाडी येथे राहणारी वनिता गुळवे ही गर्भवती महिला सांगलीच्या शासकीय रुग्णालयात बाळंतपणास दाखल होण्यास निघाली होती. जत बस स्थानकावर जत-कोल्हापूर या "विठाई" गाडीत बसली. बसने कवठेमंकाळ बस स्थानक सोडताच या महिलेच्या पोटात दुखू लागले. चालकाने गाडी रस्त्याकडेला घेतली याचवेळी या महिलेने एका गोंडस मुलाला जन्म दिला. चालक बी.टी.माने यांनी तातडीने गाडी भोसे प्राथमिक आरोग्य केंद्रात आणली.

दरम्यान बाळ आणि बाळंतिणीस या प्राथमिक आरोग्य केंद्रात दाखल केले. यावेळी आरोग्य केंद्रातील आरोग्य अधिकाऱ्यांनी बाळंतिणीची तपासणी केली असता, दोघांचीही तब्येत उत्तम असल्याचे सांगून रुग्णालयात दाखल करून घेतले. एसटीचे या विठाई बसचे चालक बी. टी. माने आणि वाहक एस. एस. चव्हाण या दोघांचेही जतच्या आगार व्यवस्थापकांनी यांनी विशेष अभिनंदन केले.