बदलापूर घटनेतील आरोपीच्या एन्काउंटरचे प्रकरण सध्या सगळीकडे चर्चेत आहे. यादरम्यान पिंपरी चिचवडच्या हिंजवडी परिसरात एका २३ वर्षीय तरुणाने ८५ वर्षीय वृद्ध महिलेवर लैंगिक आत्याचार केल्याचा धक्कादायक प्रकार समोर आला आहे. हिंजवडी परिसरात सोमवारी सायंकाळी एका उच्चभ्रू सोसायटीमध्ये ही घटना घडली. या प्रकरणी तक्रार दाखल करण्यात आली असून ओम जयचंद पुरी या आरोपीला बेड्या ठोकण्यात आल्या आहेत.

साम टीव्हीने दिलेल्या वृत्तानुसार आरोपी हा मूळचा मराठवाड्यातील धारशिव जिल्ह्यातील कळंब तालुक्यातील रहिवासी आहे. इलेक्ट्रिशीयन म्हणून काम करतो. पोलिसांनी दिलेल्या माहितीनुासार, सोमवारी सायंकाळी साडेसहाच्या सुमारास महिला सोसायटीच्या पाचव्या मजल्यावर आपल्या फ्लॅटसमोर चालली होती. यावेळी सोसायटीमधील एका फ्लॅटमध्ये कामासाठी आलेल्या ओमने वृद्ध महिलेचे तोंड दाबले व तिला सहव्या आणि सातव्या मजल्याच्या जिन्यातील मोकळ्या जागेत फरफटत नेले. गळा दाबून मारहाण करत लैंगिक अत्याचार केले.

पाऊण तास हा प्रकार सुरू होता. मात्र महिलेने आरडाओरड केल्याने सोसायटीमधील रहिवासी बाहेर आल्याने आरोपी घटनास्थळावरून पसार झाला. या भीषण प्रकारानंतर कुटुंबियांनी तत्काळ पोलिसात धाव घेतली. पोलिसांनी सीसीटीव्ही तपासत आरोपीच्या मुसक्या आवळल्या. दरम्यान आरोपीला कोर्टात हजर केले असता न्यायालयाने त्याला शुक्रवार पर्यंत पोलिस कोठडी सुनावली आहे.