पिंपरी : लॉकडाउनमुळे 40 दिवसांनंतर सुरू झालेली दारुची दुकाने, त्यामध्येच चढलेला उन्हाचा पारा यामुळे शहरातील मद्यप्रेमी मंडळी बिअरचा आस्वाद घेण्यास सर्वाधिक पसंती देत आठ दिवसामध्ये एक लाख 28 हजार लिटर बिअर रिचवली आहे. दुसऱ्या क्रमांकावर देशी दारू असून, विदेशी मद्य तिसऱ्या स्थानावर आहे. 

ताज्या बातम्यांसाठी डाऊनलोड करा ई-सकाळचे ऍप

दारूची दुकाने सुरू करण्याची परवानगी दिल्यानंतर जिल्हाधिकाऱ्यांकडून त्यासंदर्भातील आदेश येण्यास विलंब झाल्यामुळे पाच मे रोजी शहरातील सर्व दारूची दुकाने उघडली नव्हती. ज्या भागामध्ये दुकाने उघडली गेली, तिथे वाइन, रम, व्हिस्की यांची खरेदी करण्यापेक्षा बिअर घेणाऱ्यांची मोठी झुंबड उडाली होती. दुकाने सुरू झाल्यापासून आतापर्यंत मद्यप्रेमी मंडळी बिअर पिण्यातच अधिक रुची दाखवत आहेत. दारूच्या दुकानांखेरीज शहरात खास बिअरची विक्री करण्यासाठी बिअर शॉपी असून, त्याठिकाणी मद्यप्रेमींची दररोज गर्दी होत आहे. 

पुण्याच्या बातम्या वाचण्यासाठी येथे ► क्लिक करा 

बिअरच्या खालोखाल देशी दारूला पसंती दिली जात असून, आठ दिवसांच्या अवधीत सुमारे 60 हजार लिटर देशी दारूची विक्री झाली. उन्हाचा कडाका वाढल्याने विदेशी मद्य पिणाऱ्यांचे प्रमाण कमी झाले आहे. आतापर्यंत शहरात सुमारे 56 हजार लिटर विदेशी मद्याची विक्री झाली आहे. लॉकडाउननंतर दारू दुकानांसमोर लागणाऱ्या लांबच लांब रांगाची गर्दी आता कमी झाली आहे. 

पिंपरी चिंचवडच्या बातम्या वाचण्यासाठी येथे ► क्लिक करा

40 दारू दुकाने व 25 बिअर शॉपी बंद 

कोरोनाच्या वाढत्या संसर्गामुळे महापालिकेने शहरातील कंटेन्मेंट झोनमध्ये वाढ केली आहे. त्यामुळे त्या परिसरालगत असणारी 40 दारूची दुकाने बंद ठेवण्यात आली आहेत. शहरात केवळ बिअरची विक्री करणाऱ्या बिअर शॉपीची संख्या 75 पर्यंत आहे. सध्या त्यापैकी 25 बिअर शॉपी बंद आहेत. दरम्यान, दारूची विक्री करण्यासाठी सरकारने नियमावली आखून दिली आहे, त्याची अंमलबजावणी होत आहे का, यावर उत्पादनशुल्क विभागाच्या अधिकारी लक्ष ठेवून आहेत. 

शहरात दररोज होणारी मद्यविक्री लिटरमध्ये -

• देशी मद्य  : सुमारे 8,000 लिटर 
• विदेशी मद्य : सुमारे 7,000 लिटर 
• बिअर : सुमारे 16, 000 लिटर