हिंजवडी - आयटी पार्क हिंजवडीतील माण रस्त्यावरील एका छोट्या कंपनीच्या वर्कशॉपवर आणि मार्गावर एका बांधकाम साईडवरील महाकाय क्रेन थेट कोसळल्याची घटना रविवारी (ता. ६) रात्री आठच्या सुमारास घडली. सुदैवाने यात कोणालाही इजा झाली नसल्याची माहिती हिंजवडी पोलिसांनी दिली.

निर्माणाधिन कामासाठी ही क्रेन उभी होती, मात्र रात्री क्रेन जेंव्हा कोसळली तेंव्हा मोठा धमाका झाल्याची माहिती आजूबाजूच्या सोसायटीतील प्रत्यक्षदर्शीनी दिली आहे. हिंजवडी पोलीस घटनास्थळी पोहचले असून पुढील तपास सुरु आहे.

माण रस्त्यावरील एलप्रो स्कूल मागील बाजूस आणि त्यासमोरच्या गोदरेज सोसायटीच्या मधोमध ही घटना घडली आहे. एलप्रो शाळेच्या बाजूने ही क्रेन सोसायटीच्या बाजूला कोसळली आहे. सुदैवाने घटना घडली तेंव्हा शाळा बंद होती, रस्त्यावर त्या ठिकाणी वाहन नव्हतं त्यामुळं मोठी दुर्घटना टळलेली आहे. या घटनेत नेमकी कोणाची चूक होती, हे पोलीस तपासात समोर येईल.