पिंपरी : पाळलेला श्‍वान हा काही दिवसातच घरातला सदस्य बनून जातो. निगडीच्या (nigdi) प्रज्ञा पुजारी त्याला अपवाद नाहीयेत. त्यांची कुत्री आठ दिवसापूर्वी गायब झाली आहे. प्रज्ञा यांनी तातडीने रावेत पोलिस (ravet police) चौकी गाठली आणि तक्रार नोंदवली. त्यांच्या तक्रारीची दखल घेत लगेच पोलिसांनी या श्‍वानाचा शोध सुरू केला आहे. या कुत्रीला शोधून देणाऱ्यास ३ हजार रुपयांचे बक्षीस जाहीर केले आहे.

निगडी - रुपीनगर येथे राहणाऱ्या प्रज्ञा ज्ञानेश्‍वर पुजारी आयटी क्षेत्रात नोकरीला आहे. या तरूणीकडे खुशी नावाची भारतीय (गावठी) कुत्री होती. पिल्लू असल्यापासून तिचे पालनपोषण त्यांनी केले आहे. आठ दिवसांपासून निगडी परिसरातून हरवली आहे. ती दीड वर्षाची असून दिसायला सुंदर अन लाघवी होती. ती २० ऑगस्टपासून बेपत्ता झाली आहे. याबाबत त्यांनी रावेत पोलिस चौकीत तक्रार दाखल केली आहे.‘‘खुशी माझ्या कुटुंबातील सदस्य असून ती गायब झाल्यापासून मला खूप त्रास होताय, कृपया खुशीला शोधून द्या.’’ अशी भावुक साद घालत तरुणीचे अश्रू अनावर झाले आहेत. या तरुणीला खुशीचा एवढा लळा लागला आहे की, तीला शोधण्यासाठी ही तरुणी वणवण भटकत आहे.

शोधल्यास ३ हजाराचे बक्षीस

निगडीतून आठ दिवसांपासून खुशी नावाची कुत्री हरवली आहे. तिला शोधून देणाऱ्यास ३ हजाराचे बक्षीस प्रज्ञा यांनी जाहीर केले आहे. या कुत्री (खुशी) दिसल्यास ७९७२३००९५८ या क्रमांकावर संपर्क साधावा, असे आवाहन त्यांनी केले आहे. त्यांनी खुशीसोबतचे फोटो सोशल मीडियावर व्हायरल केले आहेत. त्यामुळे माणसातले प्राणीप्रेम दिसून येत आहे.

‘‘खुशी माझ्या कुटुंबातील सदस्य आहे. नकळत आईच्या हातातून सुटली आणि बेल्ट तोडून पळाली आहे. गेल्या आठ दिवसांपासून सातत्याने शोध घेत आहोत. मला तिची खूप काळजी वाटत आहे. पोलिसदेखील खुशीचा शोध घेत आहे.’’

-प्रज्ञा पुजारी, प्राणीप्रेमी, निगडी