वाकड : सध्या सुरू असलेल्या राजकीय नाट्यानंतर शिवसेनेत फुट पडल्याची शक्यता निर्माण झाली आहे. या सर्व घडामोडींच्या पार्श्वभूमीवर शनिवारी (ता. २५) सायंकाळी चिंचवडगाव चापेकर चौकातील क्रांतिवीर चापेकर स्मारकासमोर शिवसैनिकांनी बंडखोरांचा निषेध केला. प्राणात प्राण असेपर्यंत शिवसेने सोबत व मुख्यमंत्री उद्धव ठाकरे यांच्या पाठीशी ठाम राहू अशी सामुहिक शपथ शिव सैनिकांनी घेतली.यावेळी जिल्हा प्रमुख बाळासाहेब वाल्हेकर, शहर संघटक संतोष सौंदणकर, चिंचवड शहरप्रमुख अनंता कोरहाळे, उपविभाग प्रमुख कुदरत खान, युवा सेना अधिकारी माऊली जगताप, वेताळ नगर शाखा प्रमुख माजिद शेख, विभाग संघटक राजेश अरसुळ यांच्यासह मोठ्या संख्यने शिवसैनिक उपस्थित होते. जय भवानी जय शिवाजी!, गद्दारांचे करायचे काय?

खाली मुंडके वर पाय! क्षमा नाही क्षमा नाही, गद्दारांना क्षमा नाही! महाराष्ट्र का नेता कैसा हो, उद्धव साहेब जैसा हो! अशा घोषणा देण्यात आल्या. तत्पूर्वी सेनेचे काही पदाधिकारी या निषेध कार्यक्रमाची परवानगी मागण्यासाठी चिंचवड पोलिसांकडे गेले होते मात्र सध्याचे तापलेले राजकारण आणि या प्रकरणाला वेगळे वळण लागू नये म्हणून पोलिसांनी परवानगी नाकारली तरीही शांततेत निषेध करू आणि सामूहिक शपथ घेवू असे आश्वासन देत शिवसैनिकांनी हे निषेध आंदोलन केले. संतोष सौंदनकर यांनी शिवसैनिकांना शपथ दिली. चिंचवड वेताळ नगर आणि मोरया नगर शाखेने आयोजन केले होते.