पिंपरी - राष्ट्रवादी कॉंग्रेसचे शहराध्यक्ष अजित गव्हाणे यांनी मंगळवारी (ता. १६) आपल्या पदाचा राजीनामा दिला. त्‍यांच्‍यासोबत त्यांचे समर्थक शहर कार्याध्यक्ष राहुल भोसले, भोसरी विधानसभा अध्यक्ष पंकज भालेकर व विद्यार्थी विभागाचे शहराध्यक्ष यश साने यांनी आपल्या पदांचा राजीनामा दिला आहे.

गव्हाणे, भोसले व भालेकर यांनी प्रदेशाध्यक्ष सुनील तटकरे यांच्याकडे तर; साने यांनी त्यांच्या पदाचा राजीनामा राष्ट्रवादी विद्यार्थी कॉंग्रेसचे प्रदेशाध्यक्ष प्रशांत कदम यांच्याकडे दिला आहे.

गव्‍हाणे समर्थकांनी नुकतीच राष्ट्रवादी कॉंग्रेस शरदचंद्र पवार पक्षाचे राष्ट्रीय अध्यक्ष, खासदार शरद पवार यांची भेट घेतली होती.

त्‍यानंतर त्‍यांनी आज राजीनामा दिला आहे. त्यामुळे राष्ट्रवादी काँग्रेसच्या वर्तुळात खळबळ उडाली असून, ते व त्यांचे समर्थक २५ माजी नगरसेवक ज्येष्ठ नेते शरद पवार यांच्‍या नेतृत्‍वाखालील राष्ट्रवादीत उद्या (बुधवारी) प्रवेश करतील, अशी शक्यता आहे.

गव्हाणे व त्यांचे समर्थक, पदाधिकारी उद्या बैठक घेणार असून, त्यानंतर ते शरद पवार यांच्या पुण्यातील मोदीबाग येथील निवासस्थानी भेट घेणार असल्याचे विश्‍वसनीय वृत्त आहे.

लोकसभा निवडणुकीमध्ये राष्ट्रवादी शरदचंद्र पवार पक्षाला मोठे यश मिळाले. दहापैकी ८ जागांवर पक्षाच्या उमेदवारांचा विजय झाला. त्‍यामुळे राज्‍यात पक्षाला सकारात्‍मक वातावरण निर्माण झाले आहे. पिंपरी-चिंचवड शहरात आगामी विधानसभा निवडणुकीच्‍या तोंडावर राजकीय हालचाली वेगवान झाल्या आहेत.

‘मविआ’तून भवितव्य असल्याने निर्णय

मध्यंतरी गव्हाणे यांनी शरद पवार यांची भेट घेतल्‍यानंतर विविध ज्येष्ठ व्यक्ती, समविचारी पक्ष, संघटना, मंडळांच्या गाठीभेटी घेतल्या. गव्हाणे यांनी बदल करावा, असा सूर प्रत्येकाचा होता. आगामी काळात महाविकास आघाडीतून भवितव्य असल्याची जाणीव झाल्याने त्यांनी हा निर्णय घेतला, असे त्यांचे समर्थक सांगत आहेत.