पिंपरी : शेअर मार्केटमधील गुंतवणुकीवर जास्त पैसे मिळवून देण्याचे आमिष दाखवून महिलेची फसवणूक करणाऱ्या दोन जणांना पिंपरी-चिंचवड पोलिसांच्या सायबर सेलने बेड्या ठोकल्या आहेत.

तक्रारदार महिलेने ज्या अकरा बँक खात्यावर पैसे भरले; त्या बँक खात्यावर तब्बल पन्नास कोटींपेक्षा अधिक रकमेचे व्यवहार झाल्याचे समोर आले आहे. दरम्यान, पैसे भरलेली दोन बँक खाती आरोपींची असून इतर बँक खात्यांबाबत तपास सुरु आहे. अटक केलेल्या आरोपींविरुद्ध इतर राज्यांतही वीस तक्रारी प्राप्त झाल्याचे समोर आले आहे.

विकास नेमिनाथ चव्हाण (वय ४३, रा. गणेशनगर, नवी सांगवी) व प्रदीप कृष्णा लाड (वय ३२, रा. पिंपळे गुरव, सांगवी) अशी अटक केलेल्या आरोपींचा नावे आहेत. वाकड येथील महिला ही फेसबुकवर गुंतवणुकीसंदर्भात आयबीकेआर क्रिसेट अॅकेडमी गोल्डमन सॅच्चस व्हॉट्सॲप ग्रुपला जॉईन झाली.

पैसे गुंतवणूक करण्यासाठी महिलेला व्हॉट्सॲपद्वारे फॉर्म भरण्यास सांगितले. त्यानंतर, महिलेला वेगवेगळ्या बँक खात्यावर पैसे पाठविण्यास सांगितले. त्यावेळी आरोपींनी तक्रारदार महिलेला आयबीकेआर ॲपची लिंक पाठवून ते ॲप डाउनलोड करण्यास सांगितले. या ॲपवर भरलेले पैसे व झालेला नफा दिसत होता.

मात्र, पैसे काढता येत नव्हते. अशाप्रकारे महिलेला आयबीकेआर क्रिसेट अॅकेडमी गोल्डमन सॅच्चस या कंपनीत पैसे गुंतविण्यास लावून दहा लाख ६९ हजारांची फसवणूक केली. याप्रकरणी वाकड पोलिस ठाण्यात गुन्हा दाखल झाल्यानंतर हा तपास सायबर सेलकडे वर्ग करण्यात आला.