पिंपरी: वाहन चोरी करणाऱ्या दोन अल्पवयीन मुलांसह तिघांना हिंजवडी पोलिसांनी जेरबंद केले. त्यांच्याकडून १४ गुन्हे उघडकीस आले असून १९ दुचाकी जप्त केल्या आहेत. मांरुजीतील शिंदेवस्ती येथून दोन मुलांनी शिंदेवस्ती एक गाडी चोरली असून ते गाडी घेऊन हिंजवडीतील शिवाजी चौकात येणार असल्याची माहिती पोलीसांना मिळाली.

त्यानुसार, पोलिसांनी सापळा रचून दोन अल्पवयीन मुलांना ताब्यात घेतले. त्यांच्याकडे कसून तपास केला असता त्यांनी हिंजवडी, वाकड, तळेगाव-दाभाडे व पुण्यातील डेक्कन येथून दुचाकी चोरी केल्याचे कबूल केले.

तर दुसऱ्या कारवाईमध्ये गस्ती दरम्यान हिंजवडी पोलिसांनी गोविंद शंकर धाड (वय २५, रा. वाकड, मूळ-यवतमाळ) याला अटक केली. त्याच्याकडून हिंजवडी येथून चोरीला गेलेली दुचाकी जप्त केली. दरम्यान, या तिन्ही चोरट्यांकडून दहा लाख पस्तीस हजार रुपये किमतीच्या १९ दुचाकी पोलिसांनी जप्त केल्या.

यामध्ये हिंजवडी ठाण्यातील दहा, वाकडमधील दोन, तळेगाव दाभाडे व डेक्कन ठाण्यातील प्रत्येकी एक असे एकूण चौदा गुन्हे उघडकीस आले. तर इतर पाच दुचाकीच्या मूळ मालकांचा पोलिस शोध घेत आहेत.