पुणे - पुणे प्रादेशिक विभागात महावितरणकडून एका दिवसाच्या ‘विशेष मोहिमे’त अनधिकृत वीजवापर करणाऱ्या एक हजार ७२७ व्यक्तींवर कारवाई करण्यात आली. यात वीज तारेवर हूक टाकून वीज चोरी करणाऱ्या आणि मीटरमध्ये फेरफार केलेल्या एक हजार ३९० व्यक्तींचा समावेश आहे.

पुण्यासह पाच जिल्ह्यांत १३ लाख ४९ हजार युनिट म्हणजे दोन कोटी १९ लाख ७८ हजार रुपयांची वीजचोरी पकडण्यात आली.वितरण व वाणिज्यिक हानी कमी करण्यासाठी वीजचोरीविरुद्ध नियमित कारवाई सुरू आहे.

त्यासाठी पुणे प्रादेशिक संचालक अंकुश नाळे यांनी पुणे, सोलापूर, सातारा, सांगली, कोल्हापूर या जिल्ह्यांमध्ये महिन्यातून विशेष मोहीम राबविण्याचे आदेश दिले होते. त्याप्रमाणे पुणे विभागातील सर्वच जिल्ह्यांमध्ये मोहिमेला सुरवात झाली.

घरगुती, वाणिज्यिक, औद्योगिक, कृषी आदींच्या १९ हजार ९०० वीजजोडण्या तपासण्यात आली. देयकांच्या थकबाकीमुळे खंडित आलेला वीजपुरवठा परस्पर जोडून घेत किंवा अन्य ठिकाणाहून वीजवापर करणाऱ्या ग्राहकांविरुद्धही फौजदारी कारवाई करण्यात येईल.

ज्यांनी दंडात्मक रकमेसह चोरीच्या वीजवापरानुसार देयकाची रक्कम भरली नाही तर त्यांच्याविरुद्ध फौजदारी कारवाई करण्यात येईल, असे नाळे यांनी सांगितले.

एकूण १,७२७ ठिकाणी २,१९,७८,००० हजार रुपये मूल्य असलेला अनधिकृतपणे वीजवापर उघडकीस आला.