पिंपरी - राष्ट्रीय काँग्रेसचे (National Congress) पिंपरी-चिंचवड शहराचे (Pimpri Chinchwad City) माजी अध्यक्ष सुरेशभाई सोनवणे (Sureshbhai Sonawane) (वय ७४) यांचे आज अल्पशा आजाराने निधन (Death) झाले. ते महापालिका स्थायी समितीचे माजी अध्यक्ष आणि प्रसिद्ध वक्ते होते. त्यांच्यामागे पत्नी भारतीय कम्युनिस्ट पक्षाच्या कार्यकर्त्या लता भिसे-सोनवणे व पूत्र कबीर, असा परिवार आहे. (Pimpri Chinchwad Former Congress City President Sureshbhai Sonawane Passed Away)

सोनवणे यांचे जन्मगाव पाळधी (जि. जळगाव) असून सोलापूर, सातारा व पुणे येथे शिक्षण झाले. आणीबाणी नंतर झालेल्या निवडणुकीत काँग्रेसकडून अभ्यासू वक्ता म्हणून ते पुढे आले आणि युवक काँग्रेसचे काम करू लागले. प्रा. रामकृष्ण मोरे, उल्हासपवार यांचे ते समकालीन होते. यानंतर ज्येष्ठ नेते वसंतदादा पाटील यांच्या सल्ल्यानुसार त्यांनी आपले कार्यक्षेत्र पिंपरी-चिंचवड निवडले आणि १९८६साली ते काँग्रेसचे अध्यक्ष झाले. त्यांच्या नेतृत्वाखाली शहरात काँग्रेसला कायम बहुमत असे.

खराळवाडी भागाचे नगरसेवक व स्थायी समिती अध्यक्ष असताना यशवंतराव चव्हाण स्मृती (वायसीएम) रुग्णालय, अप्पू घर, चिंचवड भाजी मंडई असे अनेक प्रकल्प उभारण्यात मोठी भूमिका बजावली. महापालिका कर्मचाऱ्यांना पाचवा वेतन आयोग लागू होण्यामध्ये त्यांचा वाटा होता. महापालिकेजवळ डॉ. बाबासाहेब आंबेडकर यांचा पुतळा उभारण्यासाठी त्यांनी आपल्या वॉर्डातील झोपडपट्टी उठवून भाडेकरूसह सर्वांना निगडी ओट्यावर पर्यायी जागा दिल्या. पिंपरी-चिंचवडमध्ये हॉकीसाठी पॉलीग्रास मैदान त्यांनी तयार केले. भारिप-बहुजन महासंघातर्फे आमदारकीची निवडणूक लढवली होती. परंतु ते परत काँग्रेसमध्ये आले आणि त्यानंतर राष्ट्रवादीबरोबरच राहिले. राष्ट्रवादीचे स्वीकृत सदस्य म्हणूनही त्यांनी काम पाहिले.