तळेगाव दाभाडे, ता. ५ ः जागतिक पर्यावरण दिनानिमित्त तळेगाव दाभाडे नगरपरिषदेच्यावतीने बुधवारी दोनशे झाडांची लागवड करण्यात आली. तसेच जुना पुणे-मुंबई महामार्गालगत स्वच्छता मोहीम राबविण्यात आली.
मुख्याधिकारी एन. के. पाटील यांच्या मार्गदर्शनाखाली तळेगाव स्टेशन येथील तळे, पुणे-मुंबई महामार्गालगत वृक्षारोपण करण्यात आले. यावेळी उपमुख्याधिकारी ममता राठोड, विशाल मिंड, विजय शहाणे, सिद्धेश्वर महाजन, वीरेंद्र नारगुंडे, मनिषा चव्हाण, प्रमोद फुले, तुकाराम मोरमारे, विभा वाणी आदी अधिकारी व कर्मचारी उपस्थित होते.
पाटील म्हणाले, ‘‘पर्यावरण व्यवस्थापन ही मानव आणि निसर्ग यांच्यात समन्वय साधणारी प्रक्रिया आहे. त्याद्वारे पर्यावरणाचे संतुलन बिघडू न देता व प्रदूषणविहित पर्यावरण राखून मानवाचे हित साधण्याचा प्रयत्न केला जातो. या अनुषंगाने आपण सर्वांनी पर्यावरणपूरक साधनांचा वापर करून पर्यावरणाचा समोल राखावा.’’