वडगाव मावळ, ता. ४ : लोकप्रतिनिधी महिलांबाबत बेताल वक्तव्य करणाऱ्या कीर्तनकार बंडातात्या कराडकर यांचा मावळ तालुका राष्ट्रवादी काँग्रेस पक्षाने निषेध केला आहे. कराडकर यांच्यावर फौजदारी गुन्हा दाखल करावा, अशी मागणीही पक्षाने केली आहे. पक्षाचे तालुकाध्यक्ष बबनराव भेगडे, जिल्हा परिषद कृषी व पशुसंवर्धन समिती सभापती बाबूराव वायकर, ग्रामीण ब्लॉक अध्यक्ष सुभाष जाधव, युवक अध्यक्ष सुनील दाभाडे, महिलाध्यक्षा सुवर्णा राऊत, नारायण ठाकर, आरती घारे, प्रवीण ढोरे, अतुल राऊत, मंगेश खैरे, उमा शेळके, शैलेश वहिले आदी पदाधिकाऱ्यांनी याबाबत तहसीलदार मधुसूदन बर्गे यांना निवेदन दिले आहे. महाराष्ट्राच्या या भूमीत महिला अतिशय सक्षमपणे काम करीत असताना कराडकर यांनी महिला प्रतिनिधी खासदार सुप्रिया सुळे व माजी मंत्री पंकजा मुंडे यांच्या बाबत बेताल वक्तव्य केले आहे. त्यांची बदनामी करत समाजात तेढ निर्माण होईल असे वक्तव्य करणाऱ्या कराडकर यांच्यावर फौजदारी गुन्हा दाखल करून त्यांना अटक करावी. यापुढे महिला कर्तृत्वाची अशी नाहक बदनामी खपवून घेतली जाणार नाही, असा इशाराही दिला आहे. वारकरी संप्रदायातून त्यांची हकालपट्टी करावी, अशी मागणीही पक्षाने केली आहे.