काळेवाडी, ता. ७ : येथील ज्योतिबा उद्यानात प्रेमी युगुलांचे अश्‍लील चाळे होत असून, तळीरामांचाही अड्डेही बनले आहेत.
उद्यानातील ओपन जीम व खेळण्यांची दुरवस्था झाली आहे. प्रशासनाने या उद्यानाकडे गांभीर्याने लक्ष देण्याची मागणी नागरिकांनी केली आहे.
महापालिकेने ज्योतिबा उद्यान विकसित केले आहे. पवना नदीकाठी असलेल्या या उद्यानात हिरवीगार झाडी आहे. मात्र, उद्यानात मूलभूत सुविधा उपलब्ध नाहीत. येथे स्केटिंग रिंग बनविण्यात आली आहे. मात्र, तेथे फुटबॉल खेळला जातो. अनेकदा फेरफटका मारणाऱ्या नागरिकांना फुटबॉल लागतो. त्यामध्ये अनेक नागरिक जखमी झाले आहेत.

दृष्टीक्षेप :
-स्वच्छतागृहात तुटलेले दिवे.
-बंद दिव्यांमुळे उद्यानात अंधार
-तुटलेली खेळणी
-ओपन जीमचे साहित्य तुटलेले
-पिण्याच्या पाण्याचे तुटलेले नळ
-धबधब्याची दुरवस्था
-दिव्यांच्या उघड्या डीपीमुळे अपघाताचा धोका
-सुशोभीकरणासाठी बसविलेली एलईडी कार्बस्टोन लाइट बंद

गैरप्रकारात वाढ
उद्यानाचे मुख्यद्वार बंद असेल तर पवनानगरमधून नदीकाठालगत उद्यानात येण्यासाठी चोर मार्ग आहे. त्यामुळे उद्यानात प्रेमी युगुलांचे अश्‍लील चाळे सुरू असतात. तसेच बंद दिव्यांमुळे उद्यानात अंधार पसरत आहे. त्यामुळे गैरप्रकारही वाढले आहेत. दुपारी व रात्री उद्यान बंद झाल्यानंतर उद्यानात तळीरामांच्या पार्ट्या रंगतात. अनेकदा त्यांच्यात शिवीगाळ व भांडणेही होतात. उद्यान सुरू झाल्यानंतर बाटल्या, गुटखा व सिगारेटची पाकिटे येथे पडलेली दिसतात.

‘‘ओपन जीमवर व्यायाम प्रेमींसह ज्येष्ठ नागरिक कसरत करत असतात. मात्र, अनेक साहित्य तुटले आहे. काही खेळणी तुटली आहेत. त्यामुळे मुलांची कुचंबणा होत आहे. तसेच बंद दिवेही सुरू करणे गरजेचे असून, महापालिकेने तातडीने उद्यानाकडे लक्ष देण्याची गरज आहे.
- सचिन काळे, सामाजिक कार्यकर्ते
………

फोटो ः 16629, 16632, 16633