पिंपरी, ता. १४ ः चिंचवड येथील श्रीमन् महासाधू मोरया गोसावी महाराज प्राप्त मंगलमूर्तीची भाद्रपद पालखी यात्रा येत्या शनिवारपासून (ता. १६) सुरू होत आहे. २५ सप्टेंबरला यात्रेचा समारोप होईल, अशी माहिती देवस्थानचे मुख्य विश्वस्त मंदार महाराज देव यांनी दिली.
शनिवारी दुपारी बाराला पालखी मोरगावकडे प्रस्थान ठेवणार आहे. पालखी प्रस्थानाच्या निमित्ताने मोठी मिरवणूक काढण्यात येणार आहे. मिरवणुकीत अश्व अग्रभागी असतील. तसेच पुण्यातील ढोल पथकांचे वादन यावेळी सादर केले जाईल. मंगलमूर्ती वाडा ते समाधी मंदिर, चिंचवडगाव स्वातंत्र्यवीर सावरकर मार्ग, (पिंपरी-चिंचवड लिंकरोड) मुंबई-पुणे महामार्ग या मार्गाने पालखी पुण्यात पोचेल. शनिवारी पालखीचा मुक्काम एकनाथ मंगल कार्यालय येथे असेल.
रविवारी (ता. १७) पहाटे साडेचारला पालखी मोरगावकडे मार्गस्थ होईल. हडपसर दिवेघाट मार्गे पालखी सासवड येथील कऱ्हाबाई मंदिरात पोचेल. सोमवारी सकाळी पालखी जेजुरीमार्गे मोरगाव येथे पोचेल. त्यानंतर दोन दिवस पालखीचा मुक्काम मोरगाव येथेच असेल. गुरुवारी (ता. २१) पालखीचा परतीचा प्रवास सुरू होईल व सोमवारी (ता. २५) पालखी पुन्हा चिंचवड येथील मंदिरात येईल.