पिंपरी, ता. ११ : मुख्यमंत्री माझी लाडकी बहीण योजना पिंपरी-चिंचवडमध्ये प्रभावीपणे राबविण्यासाठी तसेच शहरातील एकही महिला या योजनेपासून वंचित राहू नये, यासाठी या योजनेचे अर्ज भरून घेण्याचे काम महिला बचत गटांना देण्यात यावे, अशी मागणी भाजपचे शहराध्यक्ष शंकर जगताप यांनी महापालिका आयुक्त शेखर सिंह यांच्याकडे केली आहे.
यासंदर्भात दिलेल्या निवेदनात म्हटले आहे, की या योजनेसाठी शहरातील महिलांचे अर्ज भरून घेण्याचे काम महापालिका प्रभाग कार्यालय स्तरावर करणार आहे. त्यामुळे प्रभाग कार्यालय स्तरावर महिलांची जास्त गर्दी होऊन, त्यांची गैरसोय होण्याची शक्यता आहे. तसेच प्रशासनाकडूनही महिलांना प्रभावीपणे मदत होईल की नाही याबाबत अनेकांच्या मनात शंका आहे. तसे झाल्यास योजनेसाठी पात्र ठरू शकणाऱ्या अनेक महिला वंचित राहतील. या सर्व शक्यतांचा विचार करून या योजनेच्या अंमलबजावणीसाठी शहरातील महिला बचत गटांना सक्रिय करून घेतल्यास एकही महिला योजनेपासून वंचित राहू शकणार नाही.

--