पिंपरी, ता. १३ : ‘आम्ही मर्डर केला आहे, आम्ही या भागातले डॉन आहोत,’ अशी धमकी देत दुकानात ट्रायलसाठी परिधान केलेले नवीन कपडे पिस्तुलाचा धाक दाखवून तिघांनी फुकट नेले. याप्रकरणी चिखली पोलिस ठाण्यात गुन्हा दाखल झाला आहे. ही घटना चिखलीतील मोरेवस्ती येथील कपड्याच्या दुकानांत घडली. याप्रकरणी कापड व्यावसायिक प्रफुल्ल मधुकर कांबळे (रा. मोरे वस्ती, चिखली) यांनी चिखली पोलिस ठाण्यात फिर्याद दिली आहे. त्यानुसार पोलिसांनी तीन अनोळखी व्यक्तींवर गुन्हा दाखल केला आहे.

(cloth-store-robbed-at-gunpoint-in-chikhali-pimpri-chinchwad)

फिर्यादी यांचे चिखली येथील अष्टविनायक चौक परिसरात रॉयल एस के मेन्स वेअर नावाचे कपड्याचे दुकान आहे. यामध्ये आरोपी आले. त्यांनी दुकानात कपडे खरेदी करणार असल्याचे सांगितले. फिर्यादीने त्यांना कपडे दाखवले. यावेळी ट्रायल रूममध्ये एकाने जाऊन शर्ट व पॅन्ट अंगात घातला. मात्र, बाहेर येऊन ते पैसे न देताच निघाले.

यावेळी फिर्यादीने त्यांना कपड्याचे पैसे मागितले असता त्यांनी पिस्तूल बाहेर काढून फिर्यादीवर रोखले. आता तुला खलास करून टाकतो, तुला पैसे मिळणार नाहीत, आम्ही नायर कॉलनीमध्ये मर्डर केला आहे, आम्ही इथले डॉन आहोत, अशी धमकी दिली. तसेच चार हजार रुपयांचे कपडे जबरदस्ती घेऊन गेले.