पिंपरी, ता. ११ : कंपनीचे रसायनमिश्रीत पाणी नाल्यावाटे इंद्रायणी नदीपात्रात सोडून सजीवांच्या आरोग्याला धोका निर्माण केल्याप्रकरणी एकावर चिखली पोलिस ठाण्यात गुन्हा दाखल झाला आहे. हा प्रकार चिखलीतील कुदळवाडी येथे घडला.
अब्दुलमलिक अब्दुलजब्बार खान (वय ३४, रा. ए विंग, जाधववाडी, चिखली) असे गुन्हा दाखल झालेल्याचे नाव आहे. आरोपीवर महाराष्ट्र पर्यावरण संरक्षण अधिनियमानुसार गुन्हा दाखल केला आहे. याप्रकरणी अमोल गणपत गोरखे यांनी चिखली पोलिस ठाण्यात फिर्याद दिली आहे. आरोपीच्या मालकीच्या कंपनीतील रसायनमिश्रीत पाणी नाल्यावाटे इंद्रायणी नदीपात्रात सोडून दिले जात आहे. त्याने, मनुष्यहानी, जैवविविधता तसेच परिसरातील सजीवांच्या आरोग्याचा प्रश्न निर्माण झाला असून पर्यावरणाची हानी केली असल्याचे फिर्यादीत म्हटले आहे.