चऱ्होली, ता. १८ ः ‘‘चऱ्होली परिसरातील पंतप्रधान आवास योजना प्रकल्प मार्गे प्राईड सोसायटी आणि बुर्डे वस्ती येथील तनिष्क पार्क अशा दोन मार्गांची पाहणी करून त्यावर पीएमपी बस सेवा कार्यान्वित करण्यात येणार आहे,’’ अशी माहिती पुणे महानगर परिवहन महामंडळाचे (पीएमपीएमएल) वाहतूक व्यवस्थापक सतीश गव्हाणे यांनी दिली.
दिघी ते आळंदी, चाकण फाटा ते मोशी टोलनाका, देहू ते आळंदी, चिखली रोड या मार्गांवरील बस सुविधा वाढविण्याची मागणी आमदार महेश लांडगे यांनी केली होती. त्या पार्श्वभूमीवर, चऱ्होली परिसरातील सार्वजनिक प्रवासी वाहतूक सुविधा सक्षम करण्याबाबत झालेल्या बैठकीदरम्यान गव्हाणे बोलत होते. पीएमपीचे आगार व्यवस्थापक उपस्थित होते. बैठकीनंतर त्यांनी बस मार्गांची पाहणी केली. सामाजिक कार्यकर्ते सचिन तापकीर, पीएमपीचे विजयकुमार मदगे, भास्कर दहातोंडे, अनिकेत गायकवाड, संदेश बडिगर आदी उपस्थित होते. चऱ्होली परिसरात मोठ्या प्रमाणात गृहनिर्माण सोसायट्या होत आहेत. नागरिक राहायला येत आहेत. वाड्या-वस्त्यांना जोडण्यासाठी रस्त्यांची बांधणी केली जात आहे. बुर्डे वस्ती जवळील तनिष्क पार्क सोसायटी आणि लोहगाव जवळील प्राईड वर्ल्ड सिटीपर्यंत मोठ्या प्रमाणात नागरीकरण झाले आहे. या भागात पीएमपी बस सुविधा सुरू करण्यासाठी आमदार लांडगे यांनी पत्रव्यवहार केला आहे.

प्रवाशांची सोय
तनिष्क पार्क सोसायटी आणि प्राईड वर्ल्ड सिटी सोसायटी या दोन्ही सोसायट्या चऱ्होली गावठाणापासून तीन ते पाच किलोमीटर अंतरावर आहेत. तेथील महिला, विद्यार्थी व कामगार यांना गावात चालत किंवा खासगी वाहनाने यावे लागते. तेथून पुढे इच्छित स्थळी पीएमपीने जावे लागते. बस सुविधा झाल्यास रहिवाशांची सोय होणार आहे.