वडगाव मावळ, ता. ९ ः महाराष्ट्र सरकारने मुख्यमंत्री माझी लाडकी बहीण योजनेद्‍वारे राज्यातील महिलांचा सन्मान केला आहे. गोर-गरीब महिलांच्या चेहऱ्यावरचा आनंद सांगत आहे की, आता पर्यंतची सर्वात मोठी भेट या योजनेद्‍वारे सरकारने दिली आहे असे प्रतिपादन खासदार श्रीरंग बारणे यांनी केले.

मावळ तालुका शिवसेनेच्यावतीने येथील शासकीय विश्राम गृहाच्या प्रांगणात सोमवारी (ता. ८) मुख्यमंत्री माझी लाडकी बहिण योजनेसंदर्भात अर्ज भरण्यासाठी विशेष शिबिराचे आयोजन करण्यात आले होते. त्याचे उद्‍घाटन खासदार श्रीरंग बारणे यांच्या हस्ते झाले. माजी राज्यमंत्री बाळा भेगडे, भाजपचे मावळ विधानसभा निवडणूक प्रमुख रवींद्र भेगडे, शिवसेनेचे तालुका प्रमुख राजेश खांडभोर, माजी सभापती गुलाबराव म्हाळसकर, संजय गांधी निराधार योजनेचे माजी तालुकाध्यक्ष नारायण ठाकर, तहसीलदार विक्रम देशमुख, गट विकास अधिकारी सुधीर भागवत, नायब तहसीलदार गणेश तळेकर, शिवसेना विभाग प्रमुख धनंजय नवघणे, सुनील मोरे, अक्षय येळवंडे, शुभांगी कळांगे, कविता हुलावळे, संतोषी खांडभोर आदी उपस्थित होते.

खासदार बारणे म्हणाले की, ‘‘राज्यातील महिलांना आत्मनिर्भर करण्यासाठी राज्य शासनाने ही महत्वाकांक्षी योजना आणली आहे. या योजनेमुळे गोर गरीब महिलांच्या चेहऱ्यावर हसू फुलले आहे.’’
माजी मंत्री बाळा भेगडे म्हणाले की, ‘‘सरकारने या योजनेतील इतर जाचक अटी शर्ती काढल्याने राज्यातील जास्तीत जास्त महिलांना या योजनेचा लाभ मिळणार आहे.’’ अंतिम मुदतीपूर्वीच महिलांनी नोंदणी करून या योजनेचा लाभ घ्यावा असे आवाहन त्यांनी केले. यावेळी मान्यवरांच्या हस्ते लाभार्थी महिलांना नोंदणी अर्जांचे वाटप करण्यात आले. तहसीलदार देशमुख यांनी योजनेची सविस्तर माहिती दिली. गटविकास अधिकारी सुधीर भागवत यांनी प्रास्ताविक केले. एकात्मिक बाल विकास प्रकल्पाधिकारी विशाल कोतागडे यांनी सूत्रसंचालन केले.