हिंजवडी - निमुळते अन ओसंडुन वाहणारे रस्ते असे चित्र सध्या हिंजवडीत असताना पादचाऱ्यांसाठी असणारे पदपथ गिळंकृत करणाऱ्या तब्बल शंभरहुन अधिक विविध व्यावसायिकावर गुरुवारी (ता. ११) हिंजवडी वाहतूक पोलिसांनी कारवाई करत त्यांना हटविले. त्यामुळे पदपथाने मोकळा श्वास घेतला तर पादचाऱ्यांचीही मोठी गैरसोय दूर झाली आहे.

हिंजवडी मेट्रो मार्गाचे काम सुरू आहे. त्याचा परिणाम वाहतूकीवर होत आहे. सर्व रस्ते कोंडीने भरत असल्याने पाय ठेवायलाही जागा उरत नाही. त्यातच पदपथावर विविध विक्रेत्यांनी अतिक्रमण केल्याने जीव मुठीत धरून पादचाऱ्यांना ये-जा करावी लागत असे. त्यामुळे अनेकदा हिंजवडी वाहतूक विभागाने या विक्रेत्यांना सूचना केल्या होत्या. तरीही काहीच बदल न झाल्याने शुक्रवारी अकरा वाजता कारवाई करण्यात आली. त्यांचे साहित्य काढून त्यांनाच परत दिले गेले. तरीही पुन्हा अतिक्रमण केल्यास थेट गुन्हे दाखल करणार असल्याचे वरिष्ठ पोलीस निरीक्षक विठ्ठल कुबडे यांनी सांगितले.

हिंजवडी शिवाजी महाराज चौक ते वाकड नाक्यापर्यंत फूटपाथवर असलेले अतिक्रमण काढण्यात आले. हिंजवडी वाहतूक विभागाचे प्रमुख विठ्ठल कुबडे यांच्या मार्गदर्शनाखाली उपनिरीक्षक दिलीप लोखंडे, स्वामी होनकळस, रोहिदास बोऱ्हाडे, अमोल पवार, जगदिश भामरे, भाऊसाहेब सानप व अधिकारी, अमलदार व चार वॉर्डन यांच्या मदतीने ही कायदेशीर कारवाई करण्यात आली.