अनेक सण आणि उत्सवात महिलांचा उत्साह काही वेगळाच असतो. यात वटपौर्णिमेचा सण महिला उत्साहात साजरा करताना दिसतात. बऱ्याच नवविवाहित स्त्रिया यंदा आपली पहिली वटपौर्णिमा साजरी करताना दिसत आहेत. मनोरंजन विश्वातील अनेक अभिनेत्री देखील त्यांच्या लग्नानंतरची पहिली वटपौर्णिमा साजरी करत आहेत. यापैकीच एक म्हणजे जिच्या लग्नाची सर्वत्र जोरदार चर्चा झाली ती अभिनेत्री म्हणजे पूजा सावंत.

अभिनेत्री पूजा सावंतनेही लग्नानंतरची तिची पहिली वटपौर्णिमा साजरी केलीय. इन्स्टाग्राम सोशल मिडिया अकाउंटवर तिने पहिल्या वटपौर्णिमेचे फोटो पोस्ट केले आहेत. पहिल्या वटपौर्णिमेसाठी पूजा सावंतचा खास साज श्रृंगार पाहायला मिळाला. पूजाने यावेळी पिवळ्या रंगाची लाल रंगाचा काठ असलेली साडी परिधान केली होती. हिरवा चुडा आणि नथने पारंपारिक लूकला चांगलीच शोभा आणली. पूजाचा हा लूक सोशल मिडीयावर चर्चेत आलाय. शिवाय पूजाने केलेल्या या पोस्टचं कॅप्शनही चांगलच चर्चेत आलय. आज मला सगळ्याच जास्त तुझी आठवण येते असं तिने या पोस्टमध्ये पतीसाठी लिहलय. पूजाचा पती ऑस्ट्रेलियात असतो मात्र पूजाने वटपौर्णिमा आवर्जून भारतात साजरी केलीय. पूजा या पोस्टमध्ये लिहीते की, "पहिली वटपौर्णिमा, सिद्धेश आज सगळ्यात जास्त तुला मिस करतेय"

लग्नानंतर पूजा ही पती सिद्धेश चव्हाणसोबत ऑस्ट्रेलियात गेली होती. त्यानंतरचे काही सण पूजाने ऑस्ट्रेलियात साजरे केले होते. मात्र वटपौर्णिमेसाठी सिद्धेश भारतात नसल्याने पूजाला सिद्धेशची आठवण येत असल्याचं तिने पोस्टमध्ये म्हटलय. लग्नानंतरचा पहिला गुढीपाडव्याचा सण पूजाने ऑस्ट्रेलियात सिद्धेशसोबत साजरा केला होता.

याचवर्षी २८ फेब्रुवारी रोजी पूजा सावंत आणि सिद्धेश चव्हाणने लगीनगाठ बांधली होती. मोठ्या धुमधडाक्यात लग्नाच्या सगळ्या विधी आणि कार्यक्रम पार पडले होते. यावर्षी पूजा सावंतचं लग्न चर्चेचा विषय ठरलं ते विविध लग्नसोहळ्याच्या कार्यक्रमासाठी. हळदी, संगीत, मेहंदी हे सगळे कार्यक्रम उत्साहात पार पडले होते. पूजाने सिद्धेश सोबतच्या रिलेशनबद्दलचं गुपीत सोशल मिडीयाच्या माध्यमातून उघडं केलं होतं. त्यानंतर ही जोडी सोशल मिडीयावरही चर्चेत असते.

तेव्हा लग्नानंतरचे यावर्षीचे प्रत्येक सण पूजा सावंत आणि सिद्धेश या जोडप्यासाठी खास असतील यात शंका नाही.