झहीर इकबालशी २३ जूनला लग्न केल्यानंतर अभिनेत्री सोनाक्षी सिन्हा सध्या तिचं लग्नानंतरचं आयुष्य एन्जॉय करतेय. लग्न ठरल्यापासून गेला बराच काळ सोनाक्षी चर्चेत होती. अनेकांनी तिच्यावर तिच्या लग्नाच्या निर्णयावरून टीका केली तर अनेकांनी तिच्या या निर्णयात तिची साथही दिली. सोनाक्षी आणि तिचे आई-वडील शत्रुघ्न आणि पूनम यांच्यात मतभेद असल्याचंही म्हंटलं जात होत पण नुकतंच तिने केलेल्या भावनिक पोस्टने या सगळ्या चर्चा धुळीस मिळाल्या आहेत.

सोनाक्षीची भावूक पोस्ट

लग्नानंतर पहिल्यांदाच सोनाक्षीने सोशल मीडियावर आई -वडिलांसाठी भावूक पोस्ट शेअर केली. त्यात ती म्हणते,"लग्नाच्या दिवशी जेव्हा माझ्या आईला जाणीव झाली कि आता मी हे घर सोडून जाणार तेव्हा ती रडू लागली तेव्हा मी तिला म्हणाले,"आई काळजी करू नकोस जुहू ते बांद्रा फक्त २५ मिनिटांचं अंतर आहे. आज त्यांची जरा जास्त आठवण येतेय आणि म्हणून मी आज स्वतःलाही हीच गोष्ट बोलून दाखवतेय. मला आशा आहे कि, रविवारी खास बनवलेली सिंधी कढी असेल...लवकरच भेटू... " सोशल मीडियावर तिची ही पोस्ट चर्चेत आहे.

सोनाक्षीच्या या पोस्टमुळे तिच्यात आणि तिच्या पालकांमध्ये दुरावा असल्याच्या चर्चांना आता पूर्णविराम मिळाला आहे. तिने शेअर केलेल्या फोटोजमध्ये तिची आई पूनम तिला मिठी मारून रडताना दिसत आहेत. त्यांचे हे फोटो चांगलेच व्हायरल झाले आहेत. अनेकांनी कमेंट करत सोनाक्षीला धीर दिला आहे.

सोनाक्षी ही शत्रुघ्न सिन्हा आणि पूनम सिन्हा यांची धाकटी मुलगी आहे. तिला लव आणि कुश हे दोन जुळे भाऊ आहेत. सोनाक्षीच्या लग्नाला पूनम, शत्रुघ्न आणि कुशने हजेरी लावली होती पण लवने काही कारणामुळे लग्नाला हजेरी लावणं टाळलं पण त्याच नेमकं कारण समोर आलं नाहीये.

सोनाक्षी ही शत्रुघ्न यांची प्रेयसी रीना रॉय सारखी दिसते यावरूनही बरीच चर्चा झाली आहे. त्या दोघींच्या चेहऱ्यातील साम्यामुळे अनेक उलटसुलट चर्चाही झाल्या आहेत. यावर सोनाक्षीने स्पष्टीकरण देताना एका मुलाखतीत म्हंटल होतं कि,"ज्या काही घडल्या त्या जुन्या गोष्टी होत्या. त्याबद्दल मला काही बोलायचं नाही पण मी रीना रॉय नाही तर मी माझ्या आईसारखी दिसते." असं स्पष्टीकरण दिलं होतं.