'बिग बॉस मराठी ५' सध्या प्रचंड गाजतोय. सोशल मीडियावरच नाही तर सगळीकडेच बिग बॉस मराठीच्या या सिझनची चर्चा आहे. या वेळेस हा सीझन वेळेच्या आधीच बंद करण्याचा निर्णय निर्मात्यांनी घेतला आहे. मात्र त्यामुळे चाहते आणि स्पर्धक दोघेही गोंधळले आहेत. त्यात मागील आठवड्यात हाताला झालेल्या दुखापतीमुळे संग्राम चौगुले बाहेर गेला त्यानंतर एलिमिनेट होऊन अरबाज पटेलही घराबाहेर झाला. आता घराबाहेर झालेल्या अरबाजने दिलेली मुलाखत सध्या सोशल मीडियावर व्हायरल होतेय. यात त्याने घरात छत्रपती शिवाजी महाराजांचा जयजयकार ना करण्याचं कारण सांगितलं आहे.

अरबाजने नुकतीच सकाळ प्रीमिअरला मुलाखत दिली. या मुलाखतीत त्याला विचारण्यात आलं की जेव्हा पुरुषोत्तम दादा घराबाहेर जात होते तेव्हा त्यांनी छत्रपती शिवाजी महाराज की जय अशा घोषणा दिल्या. तेव्हा तू नुसता उभा होतास. तू घोषणा का दिल्या नाहीस? यावर अख्खा महाराष्ट्र नारा झाला. यावर उत्तर देताना अरबाज म्हणाला, 'हे सगळं कधी घडलं मला माहीत नाही. कारण मी तसा नाहीये. संभाजी नगरमध्ये मी राहतो. सगळ्यांना माहितीये ती जागा ऐतिहासिक आहे. तिथून शिवाजी महाराजांच्याबद्दल खूप ऐकलंय. आपण आज त्यांच्यामुळेच आहोत. त्यांच्यासोबत आपण काम केलंय. तेव्हाची जी लोकं होती त्यांनी महाराजांच्या पाठीला पाठ लावून काम केलंय.'

खरंच असं काही नाहीये

तो पुढे म्हणाला, 'मी घरात माझ्याच विचारात होतो. हे सगळं कधी घडलं मी ऐकलंच नाही. काय सुरू होतं. आणि पुरुषोत्तम दादांना मीच नॉमिनेट केलेलं. त्यामुळे तो एक विचार माझ्या मनात सुरू होता. धर्म धरून राहिलो असतो तर मी मराठी बिग बॉस मध्ये कशाला आलो असतो. मी हेच सांगितलं असतं अरे मराठी बिग बॉस आहे मला नाही जायचं तिकडे पण नाही. मी तसा व्यक्ती नाहीये. मी सगळ्याच धर्माच्या बाबतीत पझेसिव्ह आहे. तसं काही नाहीये. जर लोकांना तसं वाटलंय तर मी माफी मागतो तुमची. पण खरंच असं काही नाहीये.' असं म्हणत अरबाजने त्या प्रकरणी सगळ्यांची माफी मागितली आहे.