Zee Marathi : झी मराठीवरील तुला शिकवीन चांगलाच धडा ही मालिका चांगलीच गाजतेय. अक्षरा-अधिपतीच्या हटके लव्हस्टोरीने सगळ्यांचीच मनं जिंकली आहेत. शिक्षिका अक्षरा आणि अशिक्षित पण बायकोवर मनापासून प्रेम करणाऱ्या अधिपतीने सगळ्यांची मनं जिंकली. मालिकेत आता अक्षरा आणि अधिपतीची लव्हस्टोरी सुरु झाली असून ते दोघेही हनिमूनसाठी फुकेतला रवाना झाले आहेत.

झी मराठीने सोशल मीडियावर त्यांच्या हनिमून स्पेशल वीकचा पहिला प्रोमो शेअर केला. या व्हिडिओमध्ये अक्षरा आणि अधिपती कहो ना प्यार है या गाण्यावर डान्स करताना दिसत आहेत. हे गाणं पूर्णपणे रिक्रिएट केल्याचं या प्रोमोमध्ये पाहायला मिळत आहेत. त्यांनी या प्रोमोला 'अधिपती आणि अक्षराचं नातं खुलणार..!!' असं कॅप्शन देण्यात आलं आहे.

मालिकेच्या या प्रोमोला प्रेक्षकांनी संमिश्र प्रतिक्रिया दिल्या आहेत. काहींना हा प्रोमो आवडलाय तर काहींनी मालिकेतील या ट्विस्टविषयी नाराजी व्यक्त केली आहे. तर सध्या मालिकेत भुवनेश्वरीला अधिपतीच्या वडिलांनी घराबाहेर काढल्याचं पाहायला मिळत आहे. मालिकेतील या ट्विस्टमुळे आता पुढे मालिकेत काय घडणार हे जाणून घेण्यासाठी प्रेक्षक उत्सुक आहेत. शिवानी रांगोळे, हृषीकेश शेलार आणि कविता लाड-मेढेकर यांच्या या मालिकेत मुख्य भूमिका आहेत.

काही दिवसांपूर्वीच या मालिकेची निर्माती शर्मिष्ठा राऊतने सोशल मीडियावर पोस्ट शेअर करत मालिकेची टीम शूटिंगसाठी परदेशात रवाना झाल्याची माहिती दिली होती आणि या ट्रीपची खास झलक शेअर केली होती. शर्मिष्ठाने पोस्ट शेअर करत मालिकेची लेखिका मधुगंधा कुलकर्णीचे ही सुंदर मालिका लिहिल्याबद्दल आभार मानले आहेत. शर्मिष्ठाच्या या व्हिडीओवर सर्व कलाकारांनी कौतुकाचा वर्षाव केला आहे.

मालिकेचा हा हनिमून विशेष आठवडा आज २४ जुलैपासून दररोज रात्री ८ वाजता प्रेक्षकांना पाहायला मिळणार आहे. तेव्हा पाहायला विसरू नका 'तुला शिकवीन चांगलाच धडा' फक्त झी मराठीवर.