Bollywood Entertainment News : मलबार हिलमधील एका मध्यमवर्गीय कुटूंबातून आलेल्या जॅकी श्रॉफ यांनी अल्पावधीत बॉलिवूडमध्ये स्वतःचं वेगळं स्थान निर्माण केलं. जॅकी यांनी नुकत्याच दिलेल्या मुलाखतीमध्ये त्यांच्या जुन्या आठवणींना उजाळा दिला. त्यांच्या जुन्या घराच्या आठवणी त्यांनी यावेळी शेअर केल्या.

जॅकी यांनी नुकतीच रणवीर अलाहबादीयाच्या चॅनेलवर हजेरी लावली. यावेळी त्यांनी त्यांचं करिअर, त्यांचा इंडस्ट्रीमधील स्ट्रगल पर्यावरणासाठी ते करत असलेले कार्य यावर भाष्य केलं. याबरोबरच ते आयुष्याकडे कसं बघतात याविषयीही ते भरभरून बोलले. यावेळी त्यांनी त्यांच्या लहानपणीच्या मलबार हिलच्या तीन बत्ती परिसरातील त्यांच्या चाळीतील आठवणी शेअर केल्या.

जॅकी म्हणाले,"मी अजूनही माझ्या जुन्हा चाळीतील घरात जातोय. टायगर लहान असताना त्यालाही घेऊन गेलो होतो. ती दहा बाय दहाची खोली होती. त्या खोलीत एकदा सापही शिरला होता. माझ्या लहानपणीच्या सगळ्या आठवणी त्या खोलीत दडलेल्या आहेत. एकदा मला त्या खोली उंदीर चावला होता. आम्ही जेव्हा साठीच्या दशकात पहिलं गोदरेज कंपनीचं कपाट विकत घेतलं तेव्हा ते बघायला आमच्या घरी लोकांची गर्दी जमली होती. खूप साधे आणि सुंदर दिवस होते. त्या चाळीत मला भाड्याने का होईना पण एक खोली घ्यायची आहे पण मला आता तिथे कुणी खोली देत नाही. तिथे भाडोत्री राहतो तो सोडून गेल्यावर मिळेल असं मला सांगण्यात आलं पण मला मिळणार नाही हे मला माहित आहे. तो घरमालक आता माझं जून घर विकायलाही तयार नाहीये कारण आता बिल्डिंग पुनर्वसनासाठी जाईल तिथे टॉवर होईल. त्यामुळे आता कुणीही खोल्या विकायला तयार नाही."

जॅकी यांनी यावेळी त्यांच्या दोन्ही मुलांवर संस्कार त्यांच्या आई -वडिलांनी केल्याचं सांगितलं. त्यांना कायम प्रत्येकाचा आदर करायला शिकवलं. "मी लोकांशी कसा वागतो हे बघून माझी मुलं शिकली." असं जॅकी यावेळी म्हणाले. जॅकी आता बेबी जॉन आणि सिंघम अगेन या दोन सिनेमातून प्रेक्षकांच्या भेटीस येणार आहेत.