२००० च्या दशकात आलेल्या 'काँटा लगा' या पहिल्या रिमिक्स गाण्यामुळे अभिनेत्री शेफाली जरीवाला घराघरात पोहोचली. तिचा डान्स, तिची अदा यामुळे तिला रातोरात प्रसिद्धी मिळाली आणि 'काँटा लगा' गर्ल या नावाने ती फेमस झाली. पण तुम्हाला माहितीये का ? शेफाली गेला बराच काळ एपिलेप्सी या आजाराचा सामना करत होती. तिने या आजारावर कशी मात केली ही गोष्ट तिने एका मुलाखतीमध्ये शेअर केली.

'काँटा लगा' नंतर शेफालीने अनेक डान्स नंबर्स केले पण त्यानंतर ती बराच काळ इंडस्ट्रीपासून दूर होती. एपिलेप्सी मुळे ती फार काम करू शकली नाही असं तिने एका मुलाखतीमध्ये शेअर केलं. तर बिग बॉस १३ मधील तिचा घरातील वावरही अनेकांना आवडला.

नुकत्याच पारस छाबराला दिलेल्या मुलाखतीमध्ये शेफालीने तिचा एपिलेप्सीतुन बरा होण्याचा प्रवास शेअर केला. ती म्हणाली,"मी पंधरा वर्षांची होते तेव्हा मला पहिल्यांदा फिट आली. त्यानंतर मला एपिलेप्सी असल्याचं समजलं. हा एक आजार आहे जो मेंदूमधील काही बिघाडांमुळे होतो. सुरुवातीला मला त्रास झाला. जेव्हा जेव्हा मी तणावात असायचे तेव्हा मला त्रास व्हायचा पण नंतर योग्य डाएट, व्यायाम, औषध आणि उपचार यांच्यामुळे मी आजारावर मात केली. गेली २२ वर्षं मला फिट आलेली नाहीये. या आजारावर अजूनही संशोधन सुरु आहे पण याबाबत लोकांमध्ये जागरूकता नाहीये. त्यामुळे लोक अंगात देवी येते किंवा मिरगी येते असं म्हणतात. नाकाला कांदा लावतात पण त्याने काही होत नाही."

या आजारात अध्यात्माने खूप मदत केली असंही ती म्हणाली. या सगळ्याच श्रेय तिने तिच्या आजीला दिल. ती म्हणाली,"माझ्या आजीमुळे मी अध्यात्माच्या मार्गावर आले. तिने लहानपणापासून देवावर विश्वास ठेवायला शिकवलं. त्यामुळे माझा या गोष्टीवर विश्वास बसला आणि आज मी जे काही कमावलंय ते याच जोरावर कमावलं आहे. "

बिग बॉस १३ मध्ये शेफाली एक स्ट्रॉंग स्पर्धक म्हणून पुढे आली होती पण नंतर ती या स्पर्धेतून बाहेर पडली. तिचा सिद्धार्थ शुक्ला आणि आसीम रियाझशी असलेला बॉण्ड सगळ्यांना आवडला.