नुकताच 'बिग बॉस मराठी ५' चा ग्रॅड फिनाले पार पडला. यात झापून झुपक रीलस्टार सुरज चव्हाण महाविजेता ठरला. त्यानंतर लोकप्रिय दिग्दर्शक आणि कलर्स मराठीचे प्रोग्रामिंग हेड केदार शिंदे यांनी त्याला 'झापूक झुपक' या सिनेमाची ऑफर दिली. त्यानंतर काही कलाकारांनी त्याला थेट सिनेमाची ऑफर मिळाली म्हणून नाराजी व्यक्त केली होती. आम्ही १०- १० वर्ष थिएटर करूनही आम्हाला सिनेमा मिळत नाही पण याला छपरीपणा करून चित्रपट मिळाला असं म्हणत त्यांनी सुरजला ट्रोल केलं होतं. आता नुकत्याच दिलेल्या मुलाखतीत केदार शिंदे यांनी या कलाकारांच्या पोस्टवर उत्तर दिलं आहे.

अशी कशी संधी मिळू शकते

केदार शिंदे यांनी नुकतीच लोकमत फिल्मीला मुलाखत दिली. यात बोलताना ते म्हणाले, 'एक व्यक्ती फक्त तीन महिन्याचा राहू नये. जर त्याच्यात टॅलेंट आहे वेगळं काहीतरी आह तर मी ती रिस्क घ्यायला तयार आहे. मलाही कुणीतरी कधीतरी संधी दिली होती. असं अचानक कुणी नाटक सिनेमा दिलेलं नव्हतं. त्याच्या लेखी त्याने खूप धडपड केली असेल. जेव्हा सिनेमा येईल. तेव्हा त्या लोकांना जाणवेल की हा रोल फक्त सुरजचं करू शकतो. आता राहिला प्रश्न अशी कशी संधी मिळू शकते. तर त्या त्या लोकांनी विचार करायला पाहिजे की आजपर्यंत मला नवीन लोकांसोबत काम करायला कधीच कुठलीच भीती वाटली नाही. प्रियांका यादव, क्रांती रेडकर, स्मिता शेवाळे,, भरत जाधव, अंकुश चौधरी यांनी पहिल्यांदा माझ्यासोबत काम केलं आणि त्यांच्यासोबत काम केलं.'

मी हाच विचार करत बसलो असतो तर...

ते पुढे म्हणाले, 'मला असं वाटतं की त्या लोकांनी असा विचार करू नये. ते जे कलाकार असतील त्यांनी त्यांच्या कामावर विश्वास ठेवावा. त्याचा विचार जास्त करावा. जेणेकरून याला किती मिळतंय आणि त्याला किती मिळतंय हे विचार नाही येणार. मग असं बघायचं तर 'बाईपण भारी देवा' च्या अगोदर जेव्हा दुसऱ्या दिग्दर्शकांचे सिनेमे चालत होते तेव्हा मी जवळपास ७ वर्ष इंडस्ट्रीतून बाहेर फेकला गेलो होतो. तेव्हा मी हाच विचार करत बसलो असतो तर महाराष्ट्र शाहीर आणि बाईपण आला नसता. मी माझ्या कामाकडे फक्त लक्ष दिलं. तर त्या त्या लोकांना एवढीच विनंती आहे की त्यांनी त्यांच्या कामाकडे लक्ष द्यावं. १०० टक्के त्यांना यापेक्षाही जास्त यश मिळेल. आता ते असं म्हणतात म्हणून त्यांना केदार शिंदे काम देणार नाहीत असं नाही. त्यांनी कधीही यावं. दरवाजे उघडे आहेत.'