अनंत अंबानी आणि राधिका मर्चंट यांनी १२ जुलै रोजी लग्नगाठ बांधली. या लग्नाला बॉलिवूडसोबतच हॉलिवूड कलाकारही हजर होते. या लग्नात आलेल्या हॉलिवूड कलाकारांपैकी एक होत्या कार्दीशियन सिस्टर्स. किम आणि क्लोई कार्दीशियन यांनी मुंबईत अंबानींच्या लग्नाला हजेरी लावली होती. त्यांनी रिक्षामध्ये बसून त्यांची इच्छाही पूर्ण करून घेतली. त्यांच्या भारतात येण्याच्या बऱ्याच चर्चा रंगल्या. त्यातही अनेक नेटकऱ्यांनी क्लोई राखी सावंत सारखी दिसते असंही म्हटलं होतं. आता क्लोई तिच्या एका वक्तव्यामुळे सोशल मीडियावर चर्चेत आहे. तिने इंडस्ट्रीतील टॉप डिझायनर मनीष मल्होत्राला चक्क लोकल डिझायनर म्हटलं आहे.

अंबानींच्या लग्नात क्लोई आणि किम या दोघीनींही मनीष मल्होत्राने डिझाइन केलेले घागरे परिधान केले होते. क्लोईला तिचा घागरा विशेष आवडला. तिने तिच्या इंस्टाग्रामवर याबद्दल एक व्हिडिओ शेअर केला होता. त्यात ती असं काही बोलली ज्यामुळे नेटकऱ्यांनी डोक्यालाच हात लावला. या व्हिडिओमध्ये क्लोई म्हणते, 'हे, सगळ्यांनी बघा माझे कपडे किती सुंदर आहेत. मी इथल्या लोकल डिझायनरने डिझाइन केलेला लेहेंगा घातला आहे. मी तुम्हाला त्याच्या नावासोबत सगळ्या डिटेल्स देईन. इतक्या बारीक पद्धतीने काम केलं आहे. हे खूप सुंदर आहे. मला हा गुलाबी रंग खूप आवडला आहे.' पण तिचं हे बोलणं नेटकऱ्यांना मात्र मुळीच आवडलेलं नाही.

एका नेटकऱ्याने यावर प्रतिक्रिया देत लिहिलं, 'क्लोई कार्दीशियन म्हणते की तिचा लेहेंगा हा लोकल डिझायनरने बनवलाय आणि हे ऐकून मला चक्कर येतेय.' आणखी एकाने लिहिलं, 'बघा त्यांना आपल्याबद्दल किती कमी माहिती असते. ती बेस्ट डिझायनरला लोकल डिझायनर म्हणतेय. आपण या लोकांना खूप जास्त महत्व देतो.' आणखी एकाने लिहिलं, 'काय वेळ आलीये. तिने मनीष मल्होत्राला लोकल म्हटलं.' तिच्या व्हिडिओवर अनेक नेटकऱ्यांनी प्रतिक्रिया दिल्या आहेत.