मुंबईतील वांद्रे येथील अभिनेता सलमान खानच्या निवासस्थानाबाहेर दोन अज्ञातांनी गोळीबार केल्यानंतर महाराष्ट्राचे मुख्यमंत्री एकनाथ शिंदे यांनी सलमान खानशी फोनवरून चर्चा केली. मुख्यमंत्री एकनाथ शिंदे यांनी मुंबई पोलीस आयुक्तांशी चर्चा करून सलमान खानची सुरक्षा वाढवण्याची सूचना केल्या आहेत. सध्या सलमान खानच्या घराबाहेर मोठा पोलीस फौजफाटा आणि फॉरेन्सिक टीम हजर असून तपास सुरू आहे.

गोळीबारानंतर शिंदेंनी सलमान खानला धीर दिला आहे. घाबरण्याचं काम नाही, तुमच्या घराबाहेरील सुरक्षेत वाढ केली जाईल, असं मुख्यमंत्री एकनाथ शिंदेंनी सलमान खानला सांगितलं आहे.

सलमान खानच्या घराबाहेर झालेल्या गोळीबारावरून विरोधकांनी राज्यातील एकनाथ शिंदे सरकारला धारेवर धरले आहे. गोळीबारावर खासदार संजय राऊत ते प्रियंका चतुवेदी आणि काँग्रेसच्या वर्षा गायकवाड यांनी मुख्यमंत्री शिंदे यांच्यावर जोरदार निशाणा साधला असून कायदा आणि सुव्यवस्थेवर प्रश्नचिन्ह उपस्थित केले आहे.

५८ वर्षीय सलमान खान आपल्या कुटुंबासोबत राहतो. उत्तर-पश्चिम मुंबईच्या उपनगरातील वांद्रे बीच परिसरातील गॅलेक्सी अपार्टमेंटमध्ये तो राहतो. राजस्थानमध्ये 1998 मध्ये काळवीट शिकारीच्या घटनेनंतर, सलीम खान आणि सलमान खान यांना अनेक वर्षांपासून लॉरेन्स बिश्नोई टोळीकडून जीवे मारण्याच्या धमक्या येत होत्या.

2022 मध्ये, सलीम खानला त्याच्या घराजवळ मॉर्निंग वॉक जाताना एक चिठ्ठी सापडली ज्यावर लिहिले होते, "सलीम खान, सलमान खान, लवकरच तुमचे हाल मूसे वाला सारखे होतील." पंजाबी रॅपर सिद्धू मूसेवाला यांची २९ मे २०२२ रोजी त्यांच्या घराजवळ गोळ्या झाडून हत्या करण्यात आली होती.

सलमान खानला मिळालेल्या धमक्यांनंतर पोलिसांनी त्याच्या सुरक्षेत वाढ केली आहे. त्याला बंदूक परवान्यासाठी परवाना देण्यात आला आहे. गेल्या वर्षी, अभिनेत्याने अतिरिक्त सुरक्षा म्हणून नवीन बुलेट-प्रूफ एसयूव्ही खरेदी केली.