Parineeti Chopra : अभिनेत्री परिणीती चोप्रा सध्या ‘अमर सिंह चमकिला’ या चित्रपटामुळे चर्चेत आहे. या चित्रपटात अमरजोत कौरची भूमिका साकारण्यासाठी तिने सुमारे १६ किलो वजन वाढवले होते. चित्रपटांसोबतच वैयक्तिक आयुष्यामुळेही ती सतत चर्चेत असते.

अलीकडेच, तिने राघव चढ्ढासोबतच्या तिच्या प्रेमकथेबद्दल अनेक खुलासे केले आहेत. एका मुलाखतीत परिणीतीने सांगितले की, त्यांची पहिली भेट लंडनमधील एका कॉन्फरन्समध्ये झाली होती, त्यांच्यामध्ये तेव्हा लग्नाबाबत कोणतीही चर्चा झाली नाही; पण त्यांच्या पहिल्या डेटच्या पाच मिनिटांनंतर त्यांनी लग्न करण्याचा निर्णय घेतला होता.

परिणीती म्‍हणाली की, ‘‘सहसा मी फक्त हॅलो म्हणते आणि पुढे जाते; पण चला नाश्त्याला भेटू, असे मी राघवला म्हणाले. त्याच्याशी गप्पा मारल्यानंतर मी त्याच्या प्रेमात पडले असल्‍याचे माझ्या लक्षात आले.’’ इम्तियाज अली दिग्दर्शित ‘अमर सिंह चमकीला’मध्ये परिणीती चोप्राने पहिल्यांदाच दिलजीत दोसांझसोबत स्क्रीन शेअर केली आहे.

प्रेक्षकांना हा चित्रपट खूप आवडला आहे. यापूर्वी ती २०२३ मध्ये अक्षय कुमारसोबत ‘मिशन रानीगंज’मध्ये दिसली होती. हा चित्रपट बॉक्स ऑफिसवर अयशस्वी ठरला. आता परिणीती तिच्या पुढच्या प्रोजेक्टबद्दल खूप उत्सुक आहे.