लोकप्रिय मराठमोळी अभिनेत्री प्रार्थना बेहेरे हिने आपल्या अभिनयाच्या जोरावर प्रेक्षकांच्या मनात स्थान मिळवलं. गेली अनेक वर्ष प्रार्थना प्रेक्षकांच्या मनावर राज्य करते आहे. चित्रपटांसोबत तिने मालिकेमधूनही प्रेक्षकांना भुरळ पाडली. तिची 'माझी तुझी रेशीमगाठ' ही मालिका प्रचंड गाजली. तिचा 'बाई गं' हा चित्रपटदेखील काही दिवसांपूर्वी प्रदर्शित झाला होता. मात्र 'काय पो छे' या चित्रपटात प्रार्थना अभिनेता सुशांत सिंग राजपूतसोबत दिसली असती हे तुम्हाला ठाऊक आहे का? सुशांतच्या बहिणीच्या भूमिकेसाठी प्रार्थनाला विचारणा करण्यात आली होती. नुकत्याच दिलेल्या मुलाखतीत तिने याबद्दल सांगितलं आहे. एका कारणामुळे ती रिजेक्ट झाली होती.

तुझं एक ऑडिशनपण पाठव

प्रार्थना सुशांतला आधीपासून ओळखत होती. त्यांनी 'पवित्र रिश्ता' या मालिकेत एकत्र काम केलं होतं. आता राजश्रीला दिलेल्या मुलाखतीत तिने याबद्दल सांगितलं आहे की तिला 'काय पो छे' चित्रपटासाठी का रिजेक्ट केलं गेलं. मुलाखतीत बोलताना प्रार्थना म्हणाली, ''पवित्र रिश्ता' झालं होतं आणि 'काय पो छे' फिल्म येणार होती. सुशांतला काय पोचे फिल्म मिळाली होती. मला एका कास्टिंग डिरेक्टरचा फोन आला की तुम्ही पण तुमचे फोटोज पाठवा. चित्रपटात सुशांतच्या बहिणीची भूमिका होती ती गुजराती होती. त्यांच्यासाठी तुझे फोटो पाठव आणि तुझं एक ऑडिशनपण पाठव ज्यात तू गुजरातीमध्ये बोलतेयस कारण ती गुजराती मुलगी होती.'

प्रार्थना पुढे म्हणाली, 'तर मी असं मस्त छान गुजरातीत बोलून ऑडिशन पाठवलं. त्यांना ऑडिशनपण आवडलं. ते म्हणाल जवळपास झालं तुझं. मी दोन तीन महिने वाट बघितली. नंतर त्या कास्टिंग डिरेक्टरचा फोन आला आणि तो म्हणाला की नाही झालं तुझं सिलेक्शन कारण त्यांना एक गोरी मुलगी हवी आहे. माझं असं झालं की ओके. चला हा स्ट्रगल, हे रिजेक्शन. हे मला आठवतंय आवर्जून कारण कुठल्या कारणामुळे रिजेक्शन मिळू शकतं हे तुम्हाला लक्षात ठेवायला पाहिजे.' प्रार्थनाने तिच्या करिअरमध्ये अनेक हिट चित्रपटात काम केलं आहे. वर्षभरापूर्वी तिने तिचा नवा व्यवसायही सुरू केला आहे. तिचा साड्यांचा ब्रँड आहे.