बॉलिवूडचा संजू बाबा म्हणजेच संजय दत्त पुन्हा एकदा चर्चेत आला आहे. संजय दत्तने आपल्या अभिनयाने प्रेक्षकांची मनं जिंकली. त्याच्या चित्रपटांइतकंच त्याचं वैयक्तिक आयुष्यही चाहत्यांमध्ये तितकंच चर्चेत राहिलं. आता पुन्हा एकदा संजय नेटकऱ्यांमध्ये चर्चेत आहे. त्याचा एक व्हिडिओ सोशल मीडियावर व्हायरल होत आहे, ज्यामध्ये तो सात फेरे घेताना दिसत आहे. हा व्हिडिओ पाहून चाहते बुचकळ्यात पडले आहेत. संजूबाबाने पुन्हा लग्न केलंय का असा प्रश्न आता चाहते विचारताना दिसतायत. हो, हा व्हिडिओ खरा असून संजयने पुन्हा त्याची तिसरी पत्नी मान्यता हिच्यासोबत सात फेरे घेतले आहेत. पण त्याने लग्न केलेलं नाही.

हा व्हायरल व्हिडिओ संजय दत्तच्या घरातला असल्याचं म्हटलं जात आहे. नुकतंच संजय आणि मान्यता यांच्या घराच्या नूतनीकरणाचं काम करण्यात आलं होतं, आता ते पूर्ण झालं. त्यासाठी एक घरगुती पूजा आयोजित करण्यात आली होती. या पूजा सोहळ्यात संजू बाबा आणि मान्यता यांनी फेरे घेतले. हा या पूजेचा एक विधी होता. या व्हिडिओमध्ये संजयने भगव्या रंगाचा कुर्ता-पायजमा आणि ब्लाउज परिधान केला आहे, तर मान्यताही अगदी साध्या कपड्यात दिसत आहे.

संजयच्या वैयक्तिक आयुष्याबद्दल सांगायचं तर चार दशकांच्या कारकिर्दीत 135 हून अधिक चित्रपट केलेल्या 65 वर्षीय संजय दत्तने तीन वेळा लग्न केलं आहे. त्याचं पहिलं लग्न 1987 मध्ये रिचा शर्मासोबत झालं होतं. 1996 मध्ये ब्रेन ट्यूमरमुळे तिचं निधन झालं.

रिया पिल्लईसोबत दुसरं लग्न

संजयचं दुसरे लग्न 1998 मध्ये एअर होस्टेस आणि मॉडेल रिया पिल्लईसोबत झालं होतं. हे नातंही 2008 मध्ये संपुष्टात आलं. त्यानंतर संजयने 2008 मध्ये गोव्यात दिलनवाज शेख उर्फ ​​मान्यता दत्तसोबत लग्न केले. याआधी दोघेही दोन वर्षे डेट करत होते. लग्नाच्या 2 वर्षानंतर दोघेही जुळ्या मुलांचे पालक झाले.