छोट्या पडद्यावर प्रचंड लोकप्रिय असणारा बिग बॉस हा कार्यक्रम घराघरात पाहिला जातो. मोठेच नाही तर किशोरवयीन मुलंदेखील या कार्यक्रमाचे चाहते आहेत. महिन्याभरापूर्वी 'बिग बॉस ओटीटी ३' हा कार्यक्रम ओटीटीवर सुरू झाला आहे. याला प्रेक्षकांचा प्रचंड प्रतिसाद लाभतो आहे. मात्र त्यात दाखवण्यात आलेल्या एका व्हिडीओने सगळ्यांचं लक्ष वेधून घेतलं होतं. या व्हायरल व्हिडिओवरसोशल मीडियावर टीकाही करण्यात आली होती. यात घरातील सदस्य अरमान मलिक आणि त्याची दुसरी पत्नी कृतिका मलिक यांचे अश्लील चाळे दाखवण्यात आले होते. आता या विरोधात शिंदे गटाच्या आमदार मनीषा कायंदे या आक्रमक झाल्या आहेत.

'बिग बॉस ओटीटी ३' हा कार्यक्रम बंद करून या कार्यक्रमाच्या निर्मात्यांविरोधात कारवाई करत त्यांना अटक करावी अशी मागणी त्यांनी मुंबई पोलीस आयुक्त विवेक फणसळकर यांच्याकडे केली आहे. यासंदर्भात त्यांनी एक पत्र पोलीस आयुक्तांना दिलं आहे. या पत्रात त्यांनी लिहिलं, 'मा. महोदय, मागील काही दिवसांपासून वादग्रस्त ठरत असलेल्या बिगबॉस सीजन ३ या रियालिटी शोचे प्रक्षेपण २१ जून पासून सुरू झाले आहे. दररोज रात्री ९ वाजता ओटीटी वर त्याचे प्रसारण होत आहे. दिवसेंदिवस लोकप्रिय होत असलेल्या ओटीटी प्लॅटफॉर्मवर दररोज लाखो कुटुंबीय सदर शो पाहत असतात. मात्र काल दि. १८ जुलै २०२४ रोजी रात्री प्रसारित करण्यात आलेल्या शोमध्ये कलाकार कॅमेरासमोर अतिशय बिभत्स / किळसवाणे कृत्य करताना दाखवण्यात येत होते.'

पुढे त्यांनी लिहिलंय, 'सदर शोच्या दरम्यान आरमान मलिक व कृतिका मलिक या कलाकारांनी कौटुंबिक नात्यांच्या सर्व सीमा पार करत व समाजिक मूल्यांची वाट लावत शरमेने मान खाली जाईल असे कृत्य केले आहे. सदर प्रकार अत्यंत दुर्दैवी असून अश्या प्रकारे चित्रीकरण व प्रक्षेपण करणाऱ्या सर्व संबंधितांनावर तातडीने योग्य कलमान्वये कारवाई व्हावी व सदर किळसवाणा शो बंद व्हावा याकरिता अनेकांनी आवाज उठवला आहे. तरी, बिगबॉस सीजन ३ सारख्या वादग्रस्त रियालिटी शोबाबत निर्माते, कलाकार व प्रक्षेपक यांच्यावर कारवाई करण्यात यावी.'

यासोबतच मनीषा यांनी कार्यक्रमाच्या निर्मात्यांना तुम्ही हे जे करत आहात ते योग्य आहे का असा प्रश्नही विचारला आहे.