लोकप्रिय मराठी अभिनेता सिद्धार्थ चांदेकर याने आपल्या अभिनयाने प्रेक्षकांची मनं जिंकली. मालिका आणि चित्रपटांमध्ये झळकणाऱ्या सिद्धार्थने चाहत्यांच्या मनात घर केलं. सिद्धार्थने त्याचा एका मोठ्या निर्णयाने प्रेक्षकांच्या कौतुकाची थाप मिळवली होती तो निर्णय म्हणजे आईचं लग्न. सिद्धार्थने आईच्या वयाच्या ५७ व्या वर्षी तिचं लग्न लावून दिलं. गेल्या वर्षी सीमा चांदेकर यांचं मोठ्या थाटामाटात लग्न लागलं. काही जणांनी त्यांना या वयात का लग्न करताय असा प्रश्न विचारला. यावर सिद्धार्थने त्याची बाजू मांडली होती. आता एका मुलाखतीत सीमा यांनीही त्यांचं म्हणणं स्पष्टपणे सांगितलं आहे.

अभिनेत्री सीमा चांदेकर यांनी नुकतीच आरपार या युट्यूब चॅनेलला मुलाखत दिली. या मुलाखतीत बोलता त्या म्हणाल्या, 'पुन्हा लग्न करण्याचा निर्णय घ्यायला देखील मला खूप वर्ष लागली. मुलं सेटल झाली, आता त्यांचं सगळं झालंय म्हणून मी हा निर्णय घेतला असंही नाही. कारण ते दोघेही माझ्याबरोबर होतेच. त्यामुळे मला एकटं वाटायचं असं काहीच कारण नव्हतं. पण, ३ वर्षांपूर्वी माझा एक अपघात झाला होता. त्यावेळी माझ्या उजव्या हातात प्लेट होती. त्यामुळे मी कुठेही जाऊ शकत नव्हते. सिद्धार्थ सुमेधादेखील मला येऊन भेटत होते. आमचं व्हिडिओ कॉलवर बोलणं होत होतं'.

त्या पुढे म्हणाल्या, 'या वयात बाकीच्या कुठल्या गरजांसाठी म्हणून आपण लग्न करत नाही. या वयात लग्न करण्याची काय आवश्यकता आहे, असंही म्हटलं जातं. माझ्यासारख्याच प्रत्येक बाईने हा विचार करावा असंही माझं म्हणणं नाही. प्रत्येकीचा विचार वेगळा असेल. अपघाताच्या वेळी मला कुठेतरी एकटं वाटू लागलं होतं. म्हणजे मला असं सांगायचंय की माझी बाई आलेली नाही. आणि मला त्रास झालाय तर मी हे सिद्धार्थला फोनवर सांगू नाही शकत. किंवा इतर कुठल्याही गोष्टी असतील. म्हणजे आज आम्ही मैत्रिणी भेटलो, खूप मजा आली. तर हे सगळं मी प्रत्येकवेळेस मुलांना सांगू शकत नाही. मुलं ऐकतात, पण, त्यांच्याकडे तेवढा वेळही पाहिजे ना. हे मला कुठेतरी हळूहळू जाणवायला लागलं होतं. त्यामुळे आपल्यासोबत कुणीतरी हवं ही गरज वाटू लागली. हा प्रवास सोपा नव्हता पण मी निर्णय घेतला.'