Mahesh Kothare New Serial Udhe Ga Ambe : सध्या छोट्या पडद्यावर अनेक नव्या मालिका प्रेक्षकांच्या भेटीला येत आहेत. नुकतंच 'बिग बॉस मराठी ५' सुरू झालं आहे. तर काही दिवसांपूर्वीच कलर्स मराठीच्या 'आई तुळजाभवानी' या मालिकेची घोषणा करण्यात आली होती. तर झी मराठीवरही विठ्ठलाची भक्त असणारी 'सावळ्याची जणू सावली' या मालिकेची घोषणा करण्यात आली. आता स्टारप्रवाहावरही आणखी एक पौराणिक मालिका सुरु होणार आहे. ‘उदे गं अंबे…कथा साडेतीन शक्तिपीठांची’ असं या मालिकेचं नाव असून यात देवीचा महिमा दाखवण्यात येणार आहे. 'विठुमाऊली' आणि 'दख्खनचा राजा जोतिबा'च्या यशानंतर स्टार प्रवाह वाहिनी आत आणखी एक मालिका प्रेक्षकांच्या भेटीला घेऊन येत आहे. या मालिकेची निर्मिती कोठारे व्हिजन तर्फे करण्यात येत आहे.

देवी आदिशक्तीची साडेतीन शक्तिपीठं ही महाराष्ट्राची असीम श्रद्धास्थानं. महाराष्ट्रातल्या प्रत्येक घरात साडेतीन शक्तिपीठांपैकी कुठल्या ना कुठल्या देवीचं कुलदेवता म्हणून पूजन केलं जातं. ही आदिशक्ती आईप्रमाणे कुटुंबाचं रक्षण करते. पण आपल्या कुटुंबासाठी पूजनीय असलेल्या या आईसमान देवीचं महात्म्य आणि इतिहास सर्वांना माहित असतोच असं नाही. तो इतिहास सविस्तरपणे आणि रोचक पद्धतीने मांडण्याचा प्रयत्न उदे गं अंबे...कथा साडेतीन शक्तिपीठांची या भव्यदिव्य पौराणिक मालिकेतून करण्यात येणार आहे. सुप्रसिद्ध अभिनेते, निर्माते आणि दिग्दर्शक महेश कोठारे यांची कोठारे व्हिजन्स प्रायव्हेट लिमिटेड ही निर्मिती संस्था या भव्य मालिकेची निर्मिती करणार आहे.

नुकताच निर्माते महेश कोठारे यांच्या हस्ते उदे गं अंबे...कथा साडेतीन शक्तिपीठांची या मालिकेचा मुहूर्त सोहळा पार पडला. याप्रसंगी महेश कोठारे म्हणाले, ‘स्टार प्रवाहसोबत खूप जुने ऋणानुबंध आहेत. मन उधाण वाऱ्याचे ही पहिली मालिका स्टार प्रवाहसोबत केली होती. त्यानंतर विठुमाऊली, दख्खनचा राजा जोतिबा, पिंकीचा विजय असो, सुख म्हणजे नक्की काय असतं अश्या सुपरहिट मालिका केल्या. उदे गं अबे...कथा साडेतीन शक्तिपीठांची या महामालिकेतून महाराष्ट्रातील साडेतीन शक्तिपीठांचा महिमा उलगडण्यात येणार आहे. ही मालिकाही भव्यदिव्य असेल यात शंका नाही. या भव्यदिव्य मालिकेतून कोणकोणते कलाकार भेटीला येणार? सेट कसा असेल? याविषयी प्रेक्षकांना लवकरच कळेल. या नव्या प्रोजेक्टसाठी प्रेक्षकांचं प्रेम आणि आशीर्वाद मिळावेत हीच इच्छा व्यक्त करेन.'