लोकप्रिय बॉलिवूड अभिनेत्री तापसी पन्नू हिने आपल्या अभिनयाने प्रेक्षकांच्या मनात स्थान निर्माण केलं. तिने अनेक हिट चित्रपट दिले आहेत. तिच्या अभिनयाचं कायमच कौतुक होताना दिसतं. मात्र तिच्या वागण्यावर चाहते नेहमी ताशेरे ओढताना दिसतात. तापसी अनेकदा चाहत्यांसोबत आणि पापाराझींसोबतही वाईट वागताना दिसते. तिचे पापाराझींवर ओरडतानाचे व्हिडिओही व्हायरल होत असतात. अशातच आता तिचा आणखी एक व्हिडिओ व्हायरल होतोय ज्यात ती एका मुलीला सेल्फीसाठी नकार देताना दिसतेय. मात्र हा व्हिडिओ वायरल होताच त्या मुलीने कमेंट करत तिथे नेमकं काय घडलं हा सांगत तापसीच्या वागण्यावर राग व्यक्त केला आहे.

तापसीचा 'फिर आयी हसीन दिलरुबा' हा चित्रपट लवकरच प्रेक्षकांच्या भेटीला येणार आहे. त्यापूर्वी एका कार्यक्रमातील अभिनेत्रीचा व्हिडिओ व्हायरल होतोय. यात एक मुलगी तापसीसोबत स्टेजवर दिसतेय. ती तापसीसोबत हात मिळवणीदेखील करते मात्र जेव्हा ती तापसीकडे सेल्फीची मागणी करते तेव्हा तापसी तिला नम्रपणे नकार देते. हा व्हिडिओ सोशल मीडियावर येताच त्या मुलीने तापसीच्या वागण्यावर ताशेरे ओढत तिला प्रश्न विचारले आहेत. तिच्या प्रतिक्रियेवरून ती मुलगी इन्फ्लुएन्सर असल्याचं समजतं.

तिने व्हिडिओवर प्रतिक्रिया देताना लिहिलं, 'ती मी आहे. मला समजत नाही की जेव्हा तुम्ही चारी बाजूने कॅमेरांनी वेढलेले असता तेव्हा तुम्ही सेल्फीसाठी का नकार देता? आमच्यासारख्या इन्फ्लुएन्सरना बोलावण्याचं मुख्य कारण हे तिच्या चित्रपटाचं गाणं प्रमोट करणं होतं. तिला एका चांगल्या पीआरची गरज आहे. ' त्यावर एका युझरने तिला तापसी तिच्यासोबत काय बोलली हे विचारल्यावर तिने लिहिलं, 'तापसी म्हणाली की स्टेजवर सेल्फी घेऊ नको. इथे सगळेच आहेत.'

तर या व्हिडिओमध्ये त्यांच्या पाठीमागे काहीतरी कार्यक्रम सुरू असल्याचं दिसतंय. यावर अनेकांनी तापसीला दोष देत तिला ट्रोल केलं आहे. तुम्ही तिच्याकडे सेल्फीसाठी गेलातच का असा प्रश्नही अनेकांनी विचारला आहे.