मराठी सिनेसृष्टीतील लोकप्रिय जोडी म्हणजे रितेश देशमुख आणि जिनिलिया डिसुझा. ही जोडी कायमच प्रेक्षकांची आवडती राहिली आहे. त्यांनी आपल्या अभिनयाने प्रेक्षकांची मनं तर जिंकलीच सोबतच त्यांच्या वागण्यामुळे आणि चांगल्या स्वभावामुळे त्यांच्यावर कायमच कौतुकाचा वर्षाव होत असतो. ते दोघेही सोशल मीडियावर सक्रीय असतात. त्यांचे अनेक व्हिडिओ चाहत्यांमध्ये व्हायरल होत असतात. अशातच ते दोघे पुन्हा एकदा सोशल मीडियावर चर्चेत आहेत. त्यांनी एक मोठा निर्णय घेतला आहे ज्याची चाहत्यांमध्येही चर्चा आहे.

रितेश आणि जिनिलिया नेहमीच त्यांच्या कामातून चाहत्यांसमोर एक वेगळा आदर्श घालून देत असतात. आताही त्यांनी एक मोठा निर्णय घेत एक नवा पायंडा ठेवला आहे. रितेश आणि जिनिलिया यांनी त्यांचे अवयव दान करण्याचा निर्णय घेतला आहे. सध्या ऑर्गन डोनेशन महिना सुरू आहे. त्यानिमित्ताने एक व्हिडिओ शेअर करत त्यांनी हा निर्णय चाहत्यांना सांगितला आहे. या व्हिडिओमध्ये रितेश म्हणतो, 'नमस्कार, मी आणि जिनिलियाने याबद्दल खूपदा विचार केला, खूप चर्चा केली पण आजवर कधी सांगू नाही शकतो. आज १ जुलै रोजी आम्ही हे सांगू इच्छितो की आम्ही दोघांनीही एक प्रतिज्ञा केली आहे. आम्ही आमचे अवयव दान करण्याची प्रतिज्ञा केली आहे.'

त्यानंतर जिनिलिया म्हणते, 'हो आम्ही आमचे अवयव दान करण्याचा निर्णय घेतला आहे. आमच्यासाठी दुसऱ्यांना जीवन देण्याइतकी मोठी गोष्ट नाही. त्यामुळे आम्ही तुम्हालाही आवाहन करतो की तुम्हालाही असं दान करायचं असेल तर दुसऱ्यांदा विचार करू नका. तुम्हीही ही प्रतिज्ञा घ्या.' त्यांच्या या व्हिडिओवर चाहते त्यांचं कौतुक करत आहेत. रितेश लवकरच 'ककुदा' या चित्रपटात दिसणार आहे. सोबतच त्याची 'पिल' ही वेबसीरीजही लवकरच प्रदर्शित होणार आहे.