Ramayana: केजीएफ (K.G.F) स्टार यश (Yash) सध्या चर्चेत आहे ते रामायण (Ramayana) या बिग बजेट सिनेमाशी त्याच्या जोडल्या गेलेल्या नावामुळे. नितेश तिवारी दिग्दर्शित या सिनेमाची चर्चा बराच काळ सुरु आहे आणि यशला या सिनेमात रावणाची भूमिका ऑफर केल्याचं म्हंटलं जात होतं. पण काही चॅनेल्सनी दिलेल्या वृत्तानुसार यशने रावणाची भूमिका नाकारली आहे.

झूम चॅनेलने दिलेल्या वृत्तानुसार यशने रावणाची भूमिका नाकारली असून त्या जागी तो या सिनेमाचा सहनिर्माता म्हणून काम करण्याचा प्रस्ताव त्याने सिनेमाच्या टीमसमोर ठेवला होता आणि तो प्रस्ताव दिग्दर्शक नितेश तिवारी यांनी मान्य केलाय. यामुळे निर्माता म्हणून यश या सिनेमासाठी कसं काम करणार हे पाहणं आता महत्त्वाचं ठरेल.

ई -टाइम्सला सूत्रांनी दिलेल्या माहितीनुसार, यशला या प्रोजेक्टसाठी काम करायचं होतं. त्याला रामाच्या भूमिकेपेक्षा रावणाची भूमिका जास्त आव्हानात्मक वाटते आणि रणबीर प्रभू रामाची भूमिका करणार आहे हे कळल्यावर तो काम करायला अजून उत्सुक होता पण त्याच्या टीमला तसं वाटत नव्हतं. यशने जर निगेटिव्ह भूमिका केली तर तो त्याच्या चाहत्यांना दुखावेल असं त्यांना वाटलं आणि त्यांनी यशला ही भूमिका नाकारण्याचा सल्ला दिला.

यशने सुद्धा एका मुलाखतीत त्याच्या चाहत्यांविषयी सांगितलं होतं. तो म्हणाला होता की, "मी माझ्या फॅन्सच्या भावनांचा खूप आदर करतो आणि ते दुखावणार नाहीत याची काळजी घेतो. माझे फॅन्स जर मी त्यांच्या मनाविरुद्ध वागलो तर खूप जास्त दुखावले जातात."

दरम्यान रणबीर कपूरसुद्धा प्रभू रामाची भूमिका साकारण्यासाठी खूप मेहनत घेत असून त्याचा फिटनेस रुटीनचा व्हिडीओ सोशल मीडियावर व्हायरल झाला होता. ई- टाईम्सच्या वृत्तानुसार प्रभू रामांची भूमिका साकारण्यासाठी रणबीरने मांसाहारी खाणं आणि मद्यपान करणं बंद केलं आहे. प्रभू रामांच्या भूमिकेचं पावित्र्य राखण्यासाठी त्याने हे पाऊल उचलल्याचं म्हंटलं जातंय.

यशने रावणाच्या भूमिकेतून माघार घेतल्यावर ही भूमिका कोणता साकारणार हे जाणून घेण्यास चाहते उत्सुक आहेत हे नक्की. रणबीर बरोबर या सिनेमात साई पल्लवी, सनी देओल, अरुण गोविल, आदिनाथ कोठारे, लारा दत्ता आणि शिबा चड्ढा यांच्या मुख्य भूमिका आहेत