आंबेठाण, ता. ८ : खेड, शिरूरसह पुणे शहराच्या पूर्व भागाला वरदान ठरलेल्या भामा आसखेड (ता. खेड) धरणात शनिवारी (ता. ८) अवघा १५.५६ टक्के पाणीसाठा शिल्लक आहे. गेल्या वर्षीच्या तुलनेत हा साठा जवळपास ११ टक्क्यांनी कमी असून मागील वर्षी आजच्या तारखेला धरणात २६.४८ टक्के पाणीसाठा शिल्लक होता.
भामा आसखेड हे खेड तालुक्यातील पश्चिम भागात भामा नदीवर उभारलेले मातीचे धरण आहे. धरणाची पाणीसाठवण क्षमता ८.१४ टीएमसी इतकी आहे. चालू वर्षी धरण परिसरात १ जून पासून १४ मिमी पावसाची नोंद झाली आहे. तर मागील वर्षी धरण क्षेत्रात ८८४ मिमी पावसाची नोंद झाली होती.
धरणात सध्या एकूण पाणीसाठा हा १.६७ टीएमसी असून उपयुक्त पाणीसाठा हा १.१९ टीएमसी इतका आहे. मागील वर्षी आजच्या तारखेला धरणात २६.४८ टक्के पाणीसाठा होता. धरणातून पुणे शहराच्या पूर्व भागासह तीर्थक्षेत्र आळंदीला पाणीपुरवठा केला जात आहे. या धरणातून पुढील काळात पिंपरी-चिंचवड शहराला पाणी पुरवठा सुरू होणार आहे. पिंपरी चिंचवड करिता भामा आसखेड धरणातून २.१४ टीएमसी पाणीसाठा देण्यात येणार आहे. अजून हे पाणी देणे सुरू झाले नसल्याने धरणात पाणीसाठा शिल्लक दिसत आहे.
पावसाचे आगमन होईपर्यंत आणि धरणात पुरेसा पाणीसाठा जमा होईपर्यंत पाणी जपून वापरावे असे आवाहन सहाय्यक अभियंता (श्रेणी १) आश्विन पवार, शाखा अभियंता नीलेश घारे-देशमुख, कालवा निरीक्षक वसंत ढोकरे यांनी केले आहे.