पुणे - बालेवाडी येथील एका आयटी कंपनीतील अभियंता तरुणीच्या नावावर तिच्याच कंपनीतील एका सहकाऱ्याने परस्पर ४५ लाख रुपयांचे कर्ज काढून फसवणूक केल्याची घटना समोर आली आहे. या प्रकरणी अभियंता तरुणासह बँक कर्मचाऱ्यांविरुद्ध विमानतळ पोलिस ठाण्यात गुन्हा दाखल करण्यात आला आहे.

याबाबत अभियंता तरुणीने (वय ३२, रा. संजय पार्क, विमानतळ रस्ता) फिर्याद दिली आहे. त्यावरून धुव्रकुमार विष्णू शर्मा या संशयितासह बँक कर्मचाऱ्यांविरुद्ध गुन्हा दाखल केला आहे. हा प्रकार पाच एप्रिल २०१९ ते पाच मे २०२४ या कालावधीत घडला. या घटनेनंतर आरोपी शर्मा पसार झाला आहे.

पोलिसांनी दिलेल्या फिर्यादीनुसार, ही तरुणी बालेवाडी येथील व्हेरिटास सॉफ्टवेअर टेक्नॉलॉजिस इंडिया प्रा. लि. कंपनीत आयटी अभियंता आहे. तर, आरोपी ध्रुवकुमार शर्मा याच कंपनीत पाच वर्षांपासून नोकरीस होता. शर्माने तरुणीला आर्थिक अडचण असल्याचे सांगून विश्वासात घेतले. तिच्याकडून पे स्लीप (वेतन चिठ्ठी), बॅंक स्टेटमेंट, आधारकार्ड, पॅनकार्ड आणि इ-मेलचा पासवर्ड घेतला. त्याने पे स्लीपमध्ये वेतन वाढवून दाखवले.

या कागदपत्रांच्या आधारे आणि बनावट सह्या करून एका बॅंकेसह दोन खासगी वित्तीय संस्थांमधून ४५ लाख चार हजार रुपयांचे कर्ज घेतले. कर्ज घेतल्यानंतर त्याने काही महिने कर्जाचे हप्तेही भरले. हप्ते थकीत राहिल्यानंतर हा प्रकार तरुणीच्या लक्षात आला. तिने पोलिस ठाण्यात तक्रार दिली. पुढील तपास महिला पोलिस उपनिरीक्षक एस. आर. चौधरी करीत आहेत.