पुणे : उंड्री येथील ऑर्किड इंटरनॅशनल स्कूलमध्ये शासन मान्यतेशिवाय अनधिकृत वर्ग सुरू करून विद्यार्थी आणि पालकांची फसवणूक केल्याचा प्रकार उघडकीस आला आहे. या प्रकरणी ऑर्किड स्कूलचे अध्यक्ष, संचालकासह मुख्याध्यापिकेविरुद्ध कोंढवा पोलिस ठाण्यात गुन्हा दाखल करण्यात आला आहे.

या प्रकरणी शिक्षण विभागातील अधिकारी ज्ञानदेव आबाजी खोसे (वय ५५, रा वाघोली) यांनी कोंढवा पोलिस ठाण्यात फिर्याद दिली आहे. त्यावरून उंड्री येथील ईरा एज्युकेशन सोसायटीद्वारा संचलित ऑर्किड इंटरनॅशनल स्कूलचे अध्यक्ष जे. डिकोस्टा (रा. बंगळूर), संचालक समीर गोरडे (रा. विमाननगर) आणि मुख्याध्यापिका अनिता नायर या संशयितांविरुद्ध गुन्हा दाखल करण्यात आला आहे.

उंड्री येथील ऑर्किड इंटरनॅशनल स्कूल अनधिकृत असून, या शाळेत इयत्ता पहिली ते दहावीचे वर्ग चालविण्यात येत होते. शासन मान्यता नसतानाही शाळेत विद्यार्थ्यांना प्रवेश देण्यात आला. विद्यार्थ्यांचे मूळ जन्म प्रमाणपत्र अनधिकृतपणे ताब्यात घेणे, इतर शाळांना दाखल्यांची मागणी केली जात होती. पालकांकडून शुल्क घेऊन आणि शासनाचा महसूल बुडवून फसवणूक केल्याचे खोसे यांनी फिर्यादीत म्हटले आहे.