पुणे : पोलिसांना घर दाखविल्याच्या संशयावरून टोळक्याने तरुणाच्या डोक्यात कोयत्याने वार केल्याची घटना कोंढवा परिसरात घडली. त्यानंतर टोळक्याने कोयते हवेत फिरवत नागरिकांना धमकी देत परिसरात दहशत माजविली.

महम्मद प्यारे शेख (वय २७, रा. आश्रफनगर, कोंढवा) असे जखमी झालेल्या तरुणाचे नाव आहे. त्याने दिलेल्या फिर्यादीवरून कोंढवा पोलिस ठाण्यात एका अल्पवयीन मुलासह तिघांविरुद्ध गुन्हा दाखल केला आहे. ताहेर इफ्तिगार शेख (वय १८, रा. कोंढवा), अरबाज इलियास खान (वय २५, रा. आश्रफनगर, कोंढवा) अशी गुन्हा दाखल झालेल्या संशयितांची नावे आहेत.

पोलिसांनी दिलेल्या माहितीनुसार, फिर्यादी महम्मदने अरबाजचा साथीदार तबरेजचे घर पोलिसांना दाखविल्याचा संशय आरोपींना होता. गुरुवारी सायंकाळी महम्मद कोंढव्यातील कोणार्क पूरम सोसायटीच्या परिसरातून निघाला होता.

त्यावेळी आरोपींनी ‘तू तबरेजचे घर पोलिसांना का दाखविले?,’ अशी विचारणा करून महम्मदच्या डोक्यात कोयत्याने वार केले. त्यावेळी धावून आलेल्या नागरिकांनी आरोपींना रोखण्याचा प्रयत्न केला. तेव्हा आरोपींनी कोयते हवेत फिरवत नागरिकांना धमकी दिली. सहाय्यक पोलिस निरीक्षक राजेश उसगावकर तपास करत आहेत.