पुणे - ‘भारती विद्यापीठाचे (Bharati Vidyapeeth) आजी व माजी विद्यार्थी, शिक्षक, शिक्षकेतर सेवक आणि हितचिंतकांना एकमेकांशी जोडण्यासाठी ‘आम्ही भारतीय’ (Aamhi Bhartiy) ही मोहीम (Campaign) सुरू करण्यात येणार आहे. स्वातंत्र्य दिनाच्या अमृत महोत्सवानिमित्त विविध समाजोपयोगी उपक्रम या माध्यमातून राबविण्यात येणार आहेत,’’ अशी माहिती भारती विद्यापीठाचे कार्यवाह आणि राज्याचे कृषी व सहकार राज्यमंत्री डॉ. विश्वजित कदम यांनी दिली.

स्वातंत्र्य दिनानिमित्ताने भारती विद्यापीठाच्यावतीने या मोहिमेच्या शुभारंभानिमित्त बोधचिन्हाचे प्रकाशन करण्यात आले, या वेळी ते बोलत होते. भारती विद्यापीठाचे कुलपती डॉ. शिवाजीराव कदम, कुलगुरू डॉ. माणिकराव साळुंखे, भारती हॉस्पिटलच्या कार्यकारी संचालिका डॉ. अस्मिता जगताप, सहकार्यवाह व. भा. म्हेत्रे, डॉ. एम. एस. सगरे, डॉ. के. डी. जाधव, कुलसचिव जी जयकुमार या वेळी उपस्थित होते.

डॉ. विश्वजित म्हणाले, ‘‘स्वातंत्र्याचा अमृतमहोत्सव साजरा करताना भारती विद्यापीठदेखील हीरक महोत्सवाकडे वाटचाल करीत आहे. गेल्या ५८ वर्षांमध्ये शहरी भागाबरोबरच ग्रामीण भागातील, तळागाळातील, सर्वसामान्य, कष्टकरी कुटुंबातील युवा पिढीला शिक्षणातून समृद्धीकडे नेण्यासाठी विद्यापीठ झटत आहे.’’

डॉ. शिवाजीराव कदम म्हणाले, ‘‘विद्यापीठाने घडविलेले कर्तृत्ववान विद्यार्थी हीच विद्यापीठाच्या कार्याची खरी ओळख आहे. विद्यापीठाने शिक्षणाबरोबरच नेहमी समाजहिताला प्राधान्य दिले आहे. ‘आम्ही भारतीय’ या मोहिमेच्या माध्यमातून निर्माण होणारा संवाद सेतू विद्यापीठाच्या सामाजिक उपक्रमांसाठी उपयुक्त ठरेल. ’