Pune Wanwadi Crime News: वानवडी प्रकरणातील आरोपीला आज पुणे कोर्टासमोर हजर करण्यात आले. यावेळी कोर्टाबाहेर पोलिसांचा मोठा बंदोबस्त ठेवण्यात आला होता. आरोपीला ज्या गाडीतून आणलं जातं होतं, त्या ताफ्यात सुद्धा पोलिसांचा मोठा फौजफाटा होता. मिळालेल्या माहितीनुसार, आरोपीला कोर्टाने पाच दिवसांची पोलीस कोठडी सुनावली आहे.

आरोपी संजय रेड्डीला कोर्टासमोर हजर करण्यात आले. सुनावणीला सुरुवात होताच आरोपी ढसाढसा रडू लागला होता. सरकारी वकिलांनी यावेळी बाजू मांडताना म्हटलं की, दोन्ही मुली अल्पवयीन आहेत, त्यांना त्रास सुरू झाल्यानंतर हा प्रकार समोर आला आहे. काल गुन्हा दाखल झाला आणि रात्री आरोपीला अटक केली आहे.आरोपीची वैद्यकीय चाचणी करायची आहे. हा प्रकार आरोपीने कुठे केला, कधी आणि का केला? हे जाणून घ्यायचं आहे.

आरोपीची बाजू मांडणाऱ्या वकिलांनी कोर्टाला विनंती केली की आरोपीला कमी कोठडी देण्यात यावी. आरोपीचे वकील म्हणाले की, आरोपीची तपासणी करायची असेल तर एक किंवा दोन दिवसांची पोलीस कोठडी पुरेशी होते. आरोपीला डायबिटीस आहे. त्यामुळे त्याला कमी कोठडी द्यावी. दोन्ही वकिलांची बाजू ऐकून घेतल्यानंतर कोर्टाने आरोपीला ८ ऑक्टोबरपर्यंतची पोलीस कोठडी सुनावली आहे.

बदलापूरमध्ये एका नामांकित शाळेत दोन चिमरड्या मुलींवर लैंगिक अत्याचार झाल्याचे समोर आले होते. त्यामुळे राज्यात एकच संतापाची लाट उसळली होती. आता अशीच घटना पुण्यातील वानवडी येथे घडली आहे. या प्रकरणी पुणेकर आक्रमक झाले आहेत. आज दुपारी वंचित बहुजन आघाडीच्या कार्यकर्त्यांनी स्कूल व्हॅन फोडली आहे. याप्रकरणी पुण्यात तणाव निर्माण झाला आहे.

पुण्यात दोन शाळकरी मुलींवर अत्याचार केल्याची धक्कादायक घटना उघडकीस आली. यामुळे पुन्हा एकदा राज्यात संतापाची लाट उसळली आहे. यावर महाराष्ट्र राज्य बालहक्क संरक्षण आयोगाच्या अध्यक्षा ॲड. सुशीबेन शाह यांची प्रतिक्रिया दिली. त्यांनी याप्रकरणी आरोपीवर कठोर कारवाईची मागणी केली आहे.