कोंढवा - शिवशंकर गिरिजा सहकारी गृहरचना संस्था मर्यादित संस्थेचे अध्यक्ष व सचिव यांना बडतर्फ करण्यात आल्यानंतर निवडणूक अधिकारी गौरी सचिन लोखंडे यांच्यावरही बडतर्फीची कारवाई करण्यात आली आहे. संस्थेचे सभासद शराफत खान यांचे वकील राजू नाईक यांनी संस्थेचे निवडणूक अधिकारी यांचे कार्यपध्दतीबाबत विभागीय सहनिबंधक सहकारी संस्था पुणे यांच्याकडे तक्रार करून त्यांना सहकार खात्याचे निवडणूक पॅनेलवरून कमी करण्याची विनंती केली होती. निवडणूक अधिकारी यांनी महाराष्ट्र सहकारी संस्था (समितीची निवडणूक) नियम २०१४चे नियम ७६मधील तरतुदींचे उल्लंघन केल्याचे उपनिबंधक सहकारी संस्था पुणे-४ यांच्याकडील अहवाल आधारे हे स्पष्ट झाले.

निवडणूक अधिकारी यांनी नियमाचे उल्लंघन करीत निवडणूक कार्यक्रम जाहीर केला. प्रारूप व अंतिम मतदारयादी जाहीर केली नाही, सभासदांना अंतिम यादीची पडताळणी करण्याची, हरकत घेण्याची व सूचना मांडण्याची संधी दिली नाही. अंतिम मतदार यादीची तारीख आणि निवडणूक नामनिर्देषन पत्रे दाखल करण्याची तारीख याबाबतचे मार्गदर्षक तत्वाचे पालन करण्यात आले नाही. नामनिर्देषनपत्र दाखल करणेचा कालावधी ५ दिवस ठेवणे आवश्यक असताना १५ दिवस ठेवला असल्याची कारणे नमूद करून विभागीय सहनिबंधक सहकारी संस्था पुणे यांनी निवडणूक अधिकारी गौरी लोखंडे यांना ई-वर्गातील सहकारी गृहनिर्माण संस्थेच्या नामतालिकेवरून कमी केले आहे.