बारामती : नेता जागरुक असला की लोकांना तत्परतेने मदत होते, प्रसंगी लोकांच्या मदतीसाठी नेते थेट मुख्यमंत्र्यांपर्यंतही दाद मागतात याचा प्रत्यय बारामतीतील एका कुटुंबास आला. तालुक्यातील एका महिलेस साप चावल्याने तिची प्रकृती अत्यवस्थ झाली होती. सुरवातीला बारामती व नंतर पुण्याला तिला रुग्णालयात दाखल केले गेले. मात्र दाखल करताना व उपचारासाठी संबंधित महिलेच्या पतीने उपमुख्यमंत्री अजित पवार यांच्याकडे मदतीसाठी धाव घेतली.

यानंतर अजित पवार यांनी त्यांचे स्वीय सहायक सुनीलकुमार मुसळे यांना संबंधितांना सर्वतोपरी मदतीच्या सूचना केल्या. इतके करुन पवार थांबले नाहीत तर मुख्यमंत्री सहायता निधीसाठी त्यांनी स्वतः संबंधित कुटुंबियांना फोन करुन प्रस्ताव मागून घेतला. इतकेच नाही तर या बाबतीत मुख्यमंत्र्यांच्या मदतीची गरज असल्याने एका बैठकीदरम्यान अजित पवार यांनी स्वतः मुख्यमंत्री एकनाथ शिंदे यांच्याकडे या कुटुंबाला विशेष बाब म्हणून मदत करण्याची विनंती केली. मुख्यमंत्र्यांनी त्वरित हा प्रस्ताव मंजूर केला.

एकीकडे ही प्रक्रीया वेगाने सुरु असतानाच संबंधित महिलेची जीवन-मरणाची लढाई संपुष्टात आली. त्या नंतर त्या कुटुंबाला पुण्यातील एका रुग्णालयाने तब्बल साडेसहा लाखांचे बिल दिले. पुन्हा अजित पवार मदतीला धावून आले आणि त्यांनी सुनीलकुमार मुसळे यांच्या मार्फत अवघ्या पन्नास हजार रुपयांपर्यंत हे बिल खाली आणले. उपचार सुरु असताना व पत्नीच्या मृत्यूनंतरही मोठ्या भावाप्रमाणे अजित पवार व सुनीलकुमार मुसळे मदतीला धावून आल्याने संबंधित कुटुंबियांनी कृतज्ञता व्यक्त केली.